Ո՛չ ՌԴ-ին, ո՛չ Վրաստանին ձեռնտու չէ, որ Լարսը անգամ մեկ ժամ փակ մնա. Երևանը լուռ է

Երեկվանից Լարսը փակ է: Հայաստանի ԱԻՆ-ից միայն արձանագրեցին փաստը՝ չպարզաբանելով, թե ի՞նչն է պատճառը: Լռում է նաև ՀՀ Էկոնոմիկայի նախարարությունը, թեպետ բերքահավաքի այս բարձր սեզոնին Լարսի բաց լինելը, մեղմ ասած, չափազանց կարևոր է:


VERELQ-ի հետ զրույցում "Միացյալ Հայաստան" կուսակցության նախագահ, նախկինում ՀՀ մաքսային համակարգում աշխատած, տնտեսական գործիչ Երվանդ Թարվերդյանը տեղեկացրեց, որ Վերին Լարսում՝ ռուսական և վրացական մաքսային ծառայությունների այսպես կոչված չեզոք գոտում, առատ անձրևի պատճառով ճանապարհը քանդվել է:


Լուսանկարը տրամադրել է Երվանդ Թարվերդյանը


"Երեկ ամբողջ օրը ուղղաթիռներով չափագրումներ են արվել, որպեսզի հնարավոր լինի շատ արագ հարցին լուծում տալ: Ռուսական կողմն էլ է շատ շահագրգիռ, քանի որ հարցը  միայն հայկական տրանսպորտային միջոցներին չի վերաբերում՝ ամբողջ հոսքը կանգնած է: Դեռ գնահատականներ չկան, թե քանի օրում ճանապարհը հնարավոր կլինի վերականգնել, բայց հուսանք, որ շատ արագ դա տեղի կունենա",- ասաց Թարվերդյանը:


Մեր զրուցակցի կանխատեսումներով՝ նվազագույնը 2-3 օր ճանապարհը դեռ փակ կլինի: Նա կարծիք հայտնեց, որ հնարավոր է, թողունակությունը վերականգնելու, ինչպես նաև կուտակումները նվազեցնելու համար, ժամանակավոր գրունտային ճանապարհ արվի: 


"Կրկնում եմ՝ ո՛չ Ռուսաստանին, ո՛չ Վրաստանին ձեռնտու չէ, որ այդ ճանապարհը անգամ մեկ ժամ փակ մնա",- շեշտեց նա:


Հաշվել, թե այս պահին կուտակումներն ինչ մասշտաբների են հասել գրեթե անհնար է: Իսկ եթե խոսենք մոտավոր, ապա Թարվերդյանը հիշեցրեց, որ ՀՀ էկոնոմիկայի նախարարը բոլորովին վերջերս Լարսի մասին խոսելիս նշում էր օրական 800 մեքենայի թողունակության մասին: Բայց հարցը նրանում է, մատնանշեց նա, որ ճանապարհը փակ է երկկողմանի, այսինքն՝ մեքենա պետք է գա, որ գնա, հետևապես հերթի լրացուցիչ կուտակումը չի լինի բազմապատկելի 800-ի, որովհետև  Հայաստանում 2400 բեռնատար չկա, որ երեք օրում ավելանա:


"Այստեղ այլ խնդիր է. եվրոպական մեքենաները, որոնք գալիս են Թուրքիայով, ավելանալու է հենց այդ հոսքը և կուտակումներն ավելացնելու են",- ավելացրեց նա:


Երվանդ Թարվերդյանը հույս հայտնեց, որ այդ հատվածի լիցքը արագ կարվի, որը կկանխի ահռելի մեծ վնասը:


"Թող վարչապետը անգործության համար համապատասխան մարդկանց պատժի. սա ասել եմ և՛ երեք տարի առաջ, և՛ կրկնում եմ այսօր: Լաստանավը դեռ մեկ ամիս առաջ պետք է գործարկված լիներ, ինչո՞ւ մինչև հիմա դա տեղի չի ունեցել: Եվ այս պահին ո՛չ լաստանավ ունենք, ո՛չ Լարսի ճանապարհն ունենք, ո՛չ էլ բեռնատար ավիափոխադրում: Սպասենք",- հավելեց նա:


Լիա Խոջոյան


 


 


 


 

Տպել

Թեմայի այլ նորություններ
Загрузка...