Պատրաստ եմ այսուհետ ևս իմ նպաստը բերել հայ֊չինական հարաբերությունների զարգացմանը. Սարգսյան

Հանրապետության նախկին նախագահ Արմեն Սարգսյանը ծննդյան տարեդարձի առթիվ շնորհավորել և լավագույն բարեմաղթանքներն է հղել Չինաստանի Ժողովրդական Հանրապետության նախագահ Սի Ծինպինին:

«Չինաստանը դարավոր ավանդույթների և նորագույն տեխնոլոգիաների երկիր է՝ հնագույն, բայց երբեք չհնացող արժեքների բազմաշերտ մշակույթով:

2012 թվականին ստանձնելով Չինաստանի առաջնորդի պաշտոնը` Դուք արձանագրել եք հսկայական տնտեսական աճ և ամրապնդել Չինաստանի դիրքը որպես տնտեսական և աշխարհաքաղաքական գերտերություն:

Շատ կարճ ժամանակահատվածում Չինաստանը կարողացել է կտրուկ մեծացնել իր ազդեցությունը գլոբալ մակարդակում և դառնալ աշխարհի առաջատար երկրներից մեկը:

Իմ երկիրն ու ժողովուրդը Չինաստանի հետ կապված են տարածությունը գերազանցող բարեկամության ամուր կամրջով, ես կրկնակի ուրախ եմ, որ կարողացել եմ մասնակիցը լինել այն ամրացնելու գործընթացին և պատրաստ եմ այսուհետ ևս իմ նպաստը բերել հայ֊չինական հարաբերությունների զարգացմանը», - մասնավորապես ասվում է ուղերձում: