Սահմանազատման հանձնաժողովը որևէ կապ չունի Լեռնային Ղարաբաղի խնդրի հետ. Փաշինյան

Սահմանազատման հանձնաժողովը որևէ կապ չունի Լեռնային Ղարաբաղի խնդրի հետ. այս մասին Կատարում «Ալ Ջազիրա» հեռուստաընկերությանը տված հարցազրույցում հայտարարել է ՀՀ վարչապետ Նիկոլ Փաշինյանը:

Նա նշել է, որ Հայաստանը Ադրբեջանի հետ հաղորդակցման տարբեր հարթություններ ունի:

"Դրանցից մեկը վերաբերում է սահմանազատման աշխատանքներին: Սահմանների անվտանգության հարցը ևս շատ կարևոր է, այն ևս այս հանձնաժողովի մանդատի ներքո է, քանի որ մենք պետք է պահպանենք կայունություն և անվտանգություն ամբողջ սահմանի երկայնքով",- ասել է նա:

Երկրորդ հարցը, ըստ Փաշինյանի, Հայաստանի և Ադրբեջանի միջև հարաբերությունների կարգավորումն է:

"Կա շփման ևս մեկ հարթակ՝ կապված տարածաշրջանային, տրանսպորտային և տնտեսական հաղորդակցությունների բացման հետ: Սակայն, իհարկե, ամենահրատապ ու կարևոր հարցը Հայաստանի և Ադրբեջանի միջև, ինչպես նաև տարածաշրջանային խաղաղության տեսանկյունից, Լեռնային Ղարաբաղի հարցն է",- նշել է Հայաստանի վարչապետը:

Նիկոլ Փաշինյանը կարևորել է Ռուսաստանի դերը՝ որպես եռակողմ հայտարարության երաշխավորի՝ նշելով, որ ՌԴ-ն Հայաստանի ռազմավարական գործընկերն ու դաշնակիցն է, և մատնանշել, որ շատ մտերիմ է նաև Ադրբեջանի հետ: