Մինչև այս տարվա վերջը ակնկալվում է 150 նոր ավտոբուսների փոխադրումը Երևան. քաղաքապետ

Երևանի քաղաքապետ Հրաչյա Սարգսյանը հայտարարել է, որ մինչև այս տարվա վերջը ակնկալվում է 150 նոր ավտոբուսների փոխադրումը Երևան:

«Այս պահի դրությամբ խնդիր ունենք: Հիմա քաղաքում հիմնականում կապույտ ավտոբուսներն են երթևեկում, մանուշակագույն ավտոբուսների պահեստամասերի ձեռք բերման հետ կապված մրցույթը չի կայանում»,-ասել է քաղաքապետն ու հավելել, որ մոտ որոշում կկայացվի պահեստամասեր ձեռք բերելու համար:

Ըստ այդմ նրա խոսքով, մանուշակագույն ավտոբուսները նույնպես կերթևեկեն, դրանց քանակն ավելի շատ կլինի: «Ինչպես նաև հաջորդ շաբաթ նախատեսում ենք 8.6-մետրանոց 150 ավտոբուսների մրցույթ հայտարարել և ակնկալում ենք, որ մինչև դեկտեմբերի 30-ը այդ ավտոբուսները կլինեն Երևանում»,-ասաց քաղաքապետը:

Սարգսյանը հիշեցրեց, որ մեկ ամիս առաջ պայմանագիր են ստորագրել 12-մետրանոց ավտոբուսներ ձեռք բերելու համար: Ժամկետը 2023 թվականին մարտ-ապրիլ ամսներն են: