Վարչապետի աթոռից մինչև բանտարկյալ. Գևորգ Պետրոսյանը՝ Փաշինյանի ապագայի մասին

Վարչապետ Նիկոլ Փաշինյանը իշխանությունը պահելու համար սկսեց «առանց կանոնների մարտեր», քանի որ հասկանում է, որ այս իշխանությունը կորցնելուց անմիջապես հետո հայտնվելու է քրեակատարողական հիմնարկում։ Այս մասին այսօր՝ ապրիլի 18-ին, լրագրողների հետ հանդիպման ժամանակ հայտարարեց ընդդիմության առաջնորդ Գեւորգ Պետրոսյանը։

Ըստ նրա՝ Փաշինյանի օրակարգում միշտ եղել է Արցախի հանձնման հարցը, այժմ նա այս կետը համարում է ավարտված, իսկ հաջորդը Հայաստանն է։ Պետրոսյանը վստահ է, որ ՀՀ Սյունիքի մարզը դառնալու է Փաշինյանի հաջորդ զոհը, սակայն այսքանով ընթացող վտանգավոր գործընթացները չեն դադարի, Արարատը կգնա Սյունիքի հետևից, հետո կհասնի Երևան։ Եվ այս ամբողջ ծրագիրն իրականացվում է իշխող մեծամասնության պատգամավորների համաձայնությամբ ու աջակցությամբ։

Պետրոսյանը հորդորեց հանրությանը չդիտարկել և չկոչել «Քաղաքացիական պայմանագիր» խմբակցության անդամներին պատգամավորներ, քանի որ նրանք պատգամավորական գործառույթներ չեն կատարում։ «Պատգամավորը պարտավոր է ժողովրդի կամքը ներկայացնել իշխանություններին, նրանք շարքային «մանդատավորներ» են, մի տեսակ Փաշինյանի կամքը թարգմանողներ և ոչ ավելին»,- ասաց Պետրոսյանը։

Այս մարդիկ մեր պետականությունը «ֆուտբոլի» են վերածել, ով ինչպես ուզում է, հարվածում է»,- ասաց նա՝ ընդգծելով, որ նման վտանգավոր գործընթացին պետք է կասեցնել։ Կոչ անելով քաղաքացիներին մասնակցել Ազատության հրապարակում ընթացող հանրահավաքին՝ Պետրոսյանը շեշտեց, որ հավատում է սկսված շարժման արդյունավետությանը և մտադիր է անձամբ մասնակցել հանրահավաքին։