Արցախը Հայաստանի համար զրահաբաճկոն է, եթե կորցնենք, կկորցնենք Հայաստանը. Զոհրաբյան

Հայտարարելով, որ միջազգային հանրությունը պահանջում է «իջեցնել նշաձողն» Արցախի կարգավիճակի հարցում՝ Նիկոլ Փաշինյանը բացահայտ ստում է: Այս մասին այսօր՝ ապրիլի 18-ին, հայտարարեց Հայաստանի խորհրդարանի նախկին պատգամավոր Նաիրա Զոհրաբյանը։

Նրա խոսքով՝ անցած շաբաթ խորհրդարանում ունեցած ելույթով Նիկոլ Փաշինյանը փաստացի հայտարարեց Արցախը հանձնելու գործընթացի մեկնարկի մասին։ Զոհրաբյանը վստահ է, որ Արցախի հանձնումը կարող է հանգեցնել միայն մեկ բանի՝ Հայոց նոր ցեղասպանության. «Ազգային ժողովում իր դիրքորոշումը հիմնավորելով՝ Փաշինյանը նշեց, որ «միջազգային հանրությունը պահանջում է իջեցնել Լեռնային Ղարաբաղի կարգավիճակի նշաձողը։ Սակայն այս հայտարարությունները բացահայտ սուտ են», - ասաց նա:

Զոհրաբյանը հիշեց, որ ռազմական գործողությունների դադարեցումից հետո ՌԴ նախագահ Վլադիմիր Պուտինը հայտարարեց, որ արցախյան խնդիրը պատերազմով չի լուծվել: Նույն ժամանակահատվածում ԵՄ-ն պաշտոնական հայտարարություն տարածեց, ըստ որի՝ Արցախի կարգավիճակը պետք է որոշվի բանակցությունների ընթացքում, իսկ Ֆրանսիայի Սենատը դիմել է գործադիր իշխանությունին՝ Արցախը ճանաչելու կոչով։ Հայաստանում ԱՄՆ դեսպան Լին Թրեյսին երեք անգամ հայտարարեց, որ Արցախի կարգավիճակի հարցը լուծված չէ, իսկ ԵԱՀԿ Մինսկի խմբի ամերիկացի նախկին համանախագահ Ջեյմս Ուորլիքն ասել է, որ երկարաժամկետ խաղաղություն տարածաշրջանում հնարավոր չէ հասնել առանց հստակեցնելու Արցախի կարգավիճակը:

«Վերոնշյալի ֆոնին թվում է, որ Նիկոլ Փաշինյանի միջազգային հանրությունը միայն Ադրբեջանն ու Թուրքիան են, որոնք պնդում են, որ Արցախն ընդգրկվի Ադրբեջանի կազմում»,- ասաց նա։ Զոհրաբյանն ընդգծեց, որ եթե այս ծրագիրը կյանքի կոչվի, «Արցախն անգամ ինքնավար մարզի կարգավիճակ չի ստանա, առավելագույնը, որի վրա կարելի է հույս դնել, տնտեսական գոտու կարգավիճակն է»։

Այս գործընթացները կանխելու համար ընդդիմադիրը քաղաքացիներին կոչ արեց ակտիվորեն մասնակցել Ազատության հրապարակում իրականացվող ակցիաներին։ Նա ընդգծեց, որ հրապարակում սկսված պայքարը ոչ թե իշխանության պայքար է, այլ ղարաբաղյան երկրորդ շարժում՝ հանուն Հայաստանի և Արցախի գոյության։ «Արցախը Հայաստանի համար զրահաբաճկոն է, եթե կորցնենք, կկորցնենք Հայաստանը»,- ընդգծեց նա։