Հայաստանի իշխանությունները բոլոր ամբիոններից հայտարարում են զինված ուժերի համակարգի բարեփոխումների մասին, սակայն հասարակությունն այս ուղղությամբ իրական քայլեր չի տեսնում։ Այս մասին, այսօր՝ ապրիլի 4-ին, պաշտպանության և անվտանգության հանձնաժողովում տեղի ունեցած քննարկումների ժամանակ ասել է «Հայաստան» ընդդիմադիր խմբակցության անդամ Գեղամ Մանուկյանը։
Նրա խոսքով, ութերորդ գումարման խորհրդարանի վեց հերթական նստաշրջանների ընթացքում ոլորտի բարեփոխումներին ազդող ոչ մի օրենքի նախագիծ չի ներկայացվել։ «Հակառակ կառավարության տարեկան ծրագրում տեղ գտած հայտարարություններին, թե բարեփոխումների փաթեթ է պատրաստվել, մինչ օրս այն չի հրապարակվել և չի ներկայացվել Ազգային ժողով։ Վերջին հաշվով, երբ ՊՆ-ն մտադիր է ներկայացնե՞լ բարեփոխումների փաթեթ»,- հարցրեց նա ներկա ՊՆ փոխնախարար Արման Սարգսյանին։
Պատգամավորը հիշեցրեց նաև, որ կառավարության վերջին նիստում գործադիրի ղեկավարը հայտարարեց Հայաստանի և Արցախի անվտանգությանը սպառնացող վտանգի ավելացման մասին, սակայն Զինված ուժերի բարձրագույն ղեկավարության կազմը դեռ չի համալրվել: Զինված ուժերի գլխավոր շտաբի պետ դեռ չի նշանակվել: Մանուկյանը հարցրեց, թե ի վերջո ե՞րբ սպասել այս նշանակումներին։
Պաշտպանության և անվտանգության հարցերով հանձնաժողովի նախագահ Անդրանիկ Քոչարյանն ընդգծեց, որ պատգամավորի երկու հարցերն էլ կապ չունեն հանձնաժողովում քննարկվող թեմայի հետ։ Նա ընդգծեց, որ տրվող հարցերը, մասնավորապես՝ ԶՈՒ գլխավոր շտաբի պետի նշանակման հարցը, փոխնախարարի լիազորությունների մեջ չեն։ Միաժամանակ նա Սարգսյանին առաջարկել է որոշել՝ անհրաժեշտ համարո՞ւմ է պատասխանել պատգամավորի հարցերին։
Սարգսյանը տեղեկացրեց, որ պաշտպանության և անվտանգության հարցերով հանձնաժողովը աշխատանքային քննարկումներ է անցկացրել պաշտպանության ոլորտին առնչվող մի շարք օրենքներում փոփոխությունների վերաբերյալ։ «Միաժամանակ Հայաստան խմբակցությունը, եթե չեմ սխալվում, նույնպես առաջարկներ է ներկայացրել։ Զինված ուժերի բարեփոխումները մեկնարկել են և իրականացման փուլում են, եթե որոշ քաղաքական ուժեր դրանք չեն տեսնում, ապա սա արդեն քաղաքական գնահատականների հարց է»,- ասաց փոխնախարարը։
Ի պատասխան՝ պատգամավորը նշեց, որ հանձնաժողովում աշխատանքային քննարկումներ են եղել մեկ օրինագծի շուրջ: Մանուկյանն ընդգծեց, որ այս օրինագիծն այն լայնածավալ բարեփոխումների միայն մեկ տարրն է, որոնց մասին իշխանությունները անընդհատ հայտարարում են։ «Պաշտպանության նախարար Սուրեն Պապիկյանը բարեփոխումների այս փաթեթի մասին հայտարարեց փետրվարին՝ խորհրդարանի ամբիոնից։ Հետո ասաց, որ իրեն դուր չի գալիս ներկայացված բարեփոխումների փաթեթը, և ուղարկել է վերանայման»,- պարզաբանեց ընդդիմադիրը՝ պնդելով խոստացված լայնածավալ բարեփոխումների նախապատրաստման ժամկետների պատասխանը։
Աքդրանիկ Քոչարյանը կրկին միջամտեց հարցուպատասխանին՝ փոխնախարարին հարցնելով` անհրաժեշտություն տեսնում է արձագանքելու պատգամավորի վերջին դիտողությանը։ Սարգսյանը հրաժարվեց պատասխանել:
