Բաքուն նույնիսկ լուրջ չի ընդունում Հայաստանի ներկայիս իշխանությունների առաջարկները. կարծիք

Հայաստանի իշխող վերնախավը չի պատկերացնում զորքերի հայելային հեռացման հնարավոր հետեւանքները։ Այս մասին այսօր՝ փետրվարի 1-ին, մամուլի ասուլիսի ժամանակ ասաց ՀՀ պաշտպանության նախկին փոխնախարար, ՀՀԿ-ական Արտակ Զաքարյանը։

«Եթե Հայաստանի կառավարությունում հասկանային, թե ինչ են նշանակում տարածքային ամբողջականություն, պետական սահման, սահմանամերձ բնակավայրեր, ինչպես նաեւ պատասխանատվություն քաղաքացիների անվտանգության համար, նման հիմար գաղափարներ նրանք չէին առաջ քաշի», - հայտարարել է Զաքարյանը: Նա զորքերի հայելային հետ քաշման գաղափարը համարել է լղոզված հայտարարություն, որը կարող է ենթադրել զորքերի կիլոմետրանոց հեռացում՝ առանց հաշվի առնելու ադրբեջանական զորքերի ներխուժումը Հայաստանի ինքնիշխան տարածք։

«Նրանք արդեն օկուպացրել են մեր տարածքը, դա արվել է բաց ռազմական ագրեսիայի միջոցով ... Եւ ի՞նչ: Մոռանանք այդ մասին և սկսենք զորքերի հայելային հեռացումը, սահմանագծումն ու սահմանազատումը։ Իրականում դա (զորքերի հայելային հեռացումը) շատ բարդ գործընթաց է, նրանք պատկերացում էլ չունեն, թե ինչ սկզբունքով պետք է իրականացվի, որտեղից, ինչպես եւ ինչ հաջորդականությամբ», – հայտարարել Է հանրապետականը։

Զաքարյանը նշեց, որ զորքերի հետքաշման արդյունքը կարող է լինել ռազմավարական կարևոր ռեսուրսների կորուստը: Արդյունքում՝ սահմանամերձ գյուղերի բնակչության մի մասը կարող է զրկվել ջրից, մյուս մասը՝ արոտավայրերից կամ կյանքի համար կարևոր այլ ռեսուրսներից ու իրավունքներից։ «Նրանք գոնե հասկանում են, թե ինչի մասին են խոսում։ Ոչ, չեն հասկանում։ Կարծում եմ ՝ նույնիսկ Ադրբեջանը նրանց ինչ - որ առաջարկներ լուրջ չի ընդունում», - եզրափակեց նա։