ԱՄՆ կոնգրեսականները մի կողմ են դրել իրենց ներքաղաքական գզվրտոցը և ցուցադրելով պետականության, երկկուսակցական համակարգի և ժողովրդավարության նկատմամբ հարգանք, միասին ընդունում են օտարերկրյա պառլամենտական պատվիրակությանը, որի երեք անդամներն էլ նույն կուսակցությունից են (դեսպանն այդ թվում):
Այդ մասին ֆեյսբուքյան իր էջում գրել է միջազգայնագետ Սուրեն Սարգսյանը՝ ներկայացնելով ՀՀ խորհրդարանական պատվիրակության կազմում «Պատիվ ունեմ» խմբակցության ղեկավար Արթուր Վանեցյանի ԱՄՆ չմեկնելու պատճառը:
«Ամերիկյան կողմը պատրաստակամություն է հայտնել ընդունել 3 մասնակցի: Փաստորեն Հայաստանի ընդդիմությունից մարդ են հանել մասնակիցների ցուցակից, որ դեսպանը հանդիպմանը մասնակցի: Դեսպանի համար սա ընդամենը հիանալի «photo opportunity» էր (Մենենդեզի հետ կապված պատմությունը վկա): Եթե նա իր տեղը զիջեր ԱԺ ցանկացած ընդդիմադիր գործչի, ապա դա շատ դրական և ադեկվատ կընդունվեր Կոնգրեսի ղեկավարության կողմից՝ որպես հավատարմություն բազմակուսակցական համակարգին և ժողովրդավարությանը:
Էլ չեմ ասում, որ դեսպանը կարող էր բանակցել 4-րդ մասնակցի համար, կամ նստել երկրորդ շարքում:
Ինչու՞ չի կարելի մի փոքր դիվանագետ, հեռատես ու խորաթափանց լինել», - ասված է Սուրեն Սարգսյանի գրառման մեջ:
VERELQ-ը հիշեցնում է, որ ավելի վաղ «Հայրենիք» կուսակցության մամուլի քարտուղարը հայտնել էր, որ պատճառը, որ «Պատիվ ունեմ» ընդդիմադիր դաշինքի խորհրդարանական խմբակցության ղեկավար Արթուր Վանեցյանը չեղյալ է հայտարարել իր այցը ԱՄՆ խորհրդարանական պատվիրակության կազմում, իշխող ուժի կամայական որոշումն է՝ սահմանափակել ընդդիմության ներկայացուցչի մասնակցությունը Վաշինգտոնում կայանալիք կարևորագույն աշխատանքային հանդիպմանը:
«Գործուղումից մի քանի ժամ առաջ Արթուր Վանեցյանին տեղեկացրել են, որ ԱՄՆ Ներկայացուցիչների պալատի խոսնակ Նենսի Փելոսիի հետ հանդիպմանը հայկական կողմից մասնակցելու է երեք մարդ, եւ որոշում է կայացվել Վանեցյանին չընդգրկել նրանց կազմում։ Փաստորեն, իշխանությունները որոշել են, որ պալատի խոսնակի հետ հանդիպմանը ընդդիմության ներկայացուցչի կարիք չկա, և հայկական կողմից հանդիպմանը կմասնակցեն Ազգային ժողովի նախագահ Ալեն Սիմոնյանը, «Քաղաքացիական պայմանագիր» խմբակցության ղեկավար Հայկ Կոնջորյանը և ԱՄՆ-ում ՀՀ դեսպան Լիլիթ Մակունցը»,-պարզաբանեց մամուլի քարտուղարը։
Արթուր Վանեցյանն ի պատասխան հայտնել է, որ այդ դեպքում նպատակահարմար չի գտնում իր այցը ԱՄՆ և չեղյալ համարել այն, «քանի որ նման օրակարգի փոփոխության պայմաններում այցը արարողակարգային բնույթ էր կրում»:
