Ֆրանսիայի ԱԳՆ-ն արձագանքել է ՀԱՊԿ խաղաղապահների դուրսբերման մասին Տոկաևի հայտարարությանը

Ֆրանսիան ի գիտություն է ընդունել Ղազախստանի նախագահ Կասիմ-Ժոմարտ Տոկաեւի հայտարարությունը մոտ օրերս ՀԱՊԿ խաղաղապահ զորակազմի դուրսբերման մասին, հայտարարել է Ֆրանսիայի ԱԳՆ ներկայացուցիչը՝ կոչ անելով երկխոսություն սկսել իրավիճակը թուլացնելու համար։


Ավելի վաղ նախագահ Տոկաեւը հայտարարել էր, որ ՀԱՊԿ խաղաղապահ զորակազմի դուրսբերումը կսկսվի երկու օրից եւ կտեւի ոչ ավելի, քան 10 օր:


«Ի գիտություն են ընդունել Ղազախստանի նախագահի հայտարարությունը ... Ղազախստանի տարածքում տեղակայված ՀԱՊԿ արագ արձագանքման ուժերի դուրսբերման վերաբերյալ։ Ֆրանսիան եւ նրա եվրոպացի գործընկերները հավատարիմ են Ղազախստանի ինքնիշխանությանը, որը պետք է լիովին պահպանվի», - հայտարարել է ԱԳՆ ներկայացուցիչը երեքշաբթի կայացած ճեպազրույցի ժամանակ՝ պատասխանելով «ՌԻԱ Նովոստի»-ի հարցին:


«Անհրաժեշտ է երկխոսություն սկսել լարվածությունը թուլացնելու համար։ Մենք այսուհետ ևս աչալուրջ հետևելու ենք մարդու հիմնարար ազատությունների և իրավունքների պահպանմանը», - նշել է նա։


VERELQ-ը հիշեցնում է, որ հունվարի 2-ին Ղազախստանի Մանգիստաուի մարզի բնակիչները ցույցի են դուրս եկել՝ հեղուկացված գազի գնի բարձրացման պատճառով։ Հունվարի 3-ին հանրահավաքներ էին սկսվել միանգամից մի քանի շրջաններում։ Բողոքի ակցիաներին միացել են նավթարդյունահանող ձեռնարկությունների աշխատակիցները։ Հունվարի 4-ին երկրի միանգամից մի քանի քաղաքներում զանգվածային անկարգություններ են սկսվել, ջարդեր են սկսվել։


2022 թ. հունվարի 6-ին ընդունված ՀԱՊԿ Հավաքական անվտանգության խորհրդի որոշման համաձայն, իրավիճակի կայունացման եւ կարգավորման համար սահմանափակ ժամանակահատվածով Ղազախստանի Հանրապետություն են ուղարկվել Հավաքական անվտանգության պայմանագրի կազմակերպության Հավաքական խաղաղապահ ուժեր:


Դրանց կազմում են Հայաստանի Հանրապետության, Բելառուսի Հանրապետության, Ղրղզստանի Հանրապետության, Ռուսաստանի Դաշնության և Տաջիկստանի Հանրապետության զինված ուժերի ստորաբաժանումները:


 


 

Տպել

Թեմայի այլ նորություններ
Загрузка...