Իրանի հետ միջուկային գործարքի տապալման դեպքում խառնաշփոթ կսկսվի. Լավրով
Իրանի միջուկային ծրագրի շուրջ գործողությունների համատեղ համապարփակ ծրագրի, ինչպես նաեւ այլ միջազգային համաձայնագրերի տապալումը խառնաշփոթի կհանգեցնի համաշխարհային գործերում: Այս մասին «Կոմերսանտ» թերթում հրապարակված հարցազրույցում հայտարարել է Ռուսաստանի արտգործնախարար Սերգեյ Լավրովը:
ՌԴ նախարարը ընդգծել է, որ եթե այս կամ այն հակամարտությունում առաջատար երկների միջեւ համաձայնեցված իրավական պայմանավորվածությունները խախտվում են, խառնաշփոթ է առաջանում: «Դա շատ տխուր կլինի», - նշել է Լավրովը:
«Ես անընդունելի եմ համարում՝ լինի դա Իրանը, Սիրիան, Լիբիան, Եմենը, թե Կորեական թերակղզին, որտեղ եւս 2005 թվականին ձեռքբերված պայմանավորվածություն կար, որը հստակ ամրագրում էր, թե ինչ է պահանջվում ԿԴԺՀ-ից եւ մնացածից»,- նշել է ՌԴ ԱԳՆ-ի ղեկավարը:
Լավրովի խոսքով՝ ամերիկացիները հանկարծ «Մակաոյի ինչ-որ բանկում ինչ-որ հաշվի հետ կապված պատմություն են գտել» եւ սկսել են կալանք դնել հյուսիսկորեական հաշիվների վրա: Ըստ նրա՝ «որքան ուզես կարելի է վիճել, թե որքանով է դա արդարացի, որքանով էր Հյուսիսային Կորեան ճիշտ եւ ԱՄՆ-ն՝ սխալ»: «Փաստը մնում է փաստ, որ կար պայմանավորվածություն, ասվել էր, որ այս պահից սկսած դադարեցվում է այն ամենը, ինչ վերաբերվում է առճակատմանը եւ ամեն տեսակ սադրիչ գործողություններին: Չստացվեց»,- նշել է Ռուսաստանի դիվանագիտական առաքելության ղեկավարը: Այժմ ամենակարեւոր խնդիրը, ըստ Սերգեյ Լավրովի, ձեռքբերված համաձայնություններին հետեւելու ունակությունն է:
Հիշեցնենք, որ անցյալ շաբաթ ԱՄՆ նախագահ Դոնալդ Թրամփը հայտարարել էր, որ ԱՄՆ-ն կդադարեցնի իր մասնակցությունը Իրանի միջուկային ծրագրի շուրջ գործողությունների համատեղ համապարփակ ծրագրին, եթե դրանում փոփոխություններ չմտցվեն: Նա հիշեցրել է, որ կրկին երկարաձգել է Իրանի նկատմամբ պատժամիջոցների վերացումը, սակայն, ըստ նրա, դա արվել է «միայն Իրանի միջուկային գործարքում առկա սարսափելի թերությունները շտկելու նպատակով եվրոպական դաշնակիցների հետ համաձայնագրի կնքման համար»:
