Ազգային ժողովի առաջիկա նստաշրջանին ընդառաջ հանդիպումների շարք ենք սկսում կուսակցության տարածքային կառույցների ներկայացուցիչների հետ: Այս մասին Facebook-ի իր էջում գրել է ԲՀԿ նախագահ Գագիկ Ծառուկյանը՝ տեղադրելով տեսանյութ, որտեղ հանդիպում է ունենում կուսակցության Կոտայքի մարզի ակտիվի հետ։ Ծառուկյանը նշել է, որ հանձնարարել էր հանդիպել ժողովրդի հետ, լսել մարդկանց հուզող հարցերը և պատրաստ է այդ հարցերին պատասխանել: Նրա խոսքով, այսօր խնդիր չկա, որ լուծում չունենա, միայն հարկավոր է տիրապետել խնդիրներին և դրանց լուծումները տալ՝ ըստ պետության հնարավորությունների: «Այսօրվանից սկսում եմ հանդիպումները հանրապետությունով մեկ ԲՀԿ-ի պատասխանատուների հետ»,- հայտարարել է Ծառուկյանը: Ի թիվս այլ հարցերի նա նշել է, որ հասարակության 90 տոկոսը դեմ է կրթական փոփոխություններին. «Մենք հայ քրիստոնյա ազգ ենք, դա մեր մեծությունն է: Ժողովրդի 90-95 տոկոսի համար այդ ծրագիրն անընդունելի է: Մենք ստորագրահավաք ենք անելու, մեծ հանրահավաք ենք կազմակերպելու: Մենք չենք կարող թույլ տանք, որ եկեղեցու դասընթացները հանվեն, սեռական դասընթացներ անցկացվեն, հայ գրականությունը հանվի, հայոց պատմությունը հանվի: Հայաստանը դրան չի գնա, ժողովուրդը դա թույլ չի տա»,- ասել է նա:
