ՀՀ վարչապետի պաշտոնակատար Նիկոլ Փաշինյանը հայտարարել է Եվրասիական տնտեսական ինտեգրման գաղափարների տարածման ուղղությամբ աշխատելու Երեւանի պատրաստակամության մասին: Այս մասին նա ասել է Եվրասիական տնտեսական բարձրագույն խորհրդի նիստի ժամանակ՝ տեսակոնֆերանսի ձևաչափով։ «ԵԱՏՄ-ի և երրորդ երկրների միջև ազատ առևտրի և առևտրատնտեսական համագործակցության մասին համաձայնագիրը ցույց տվեց իր պահանջվածությունը։ Այս տեսանկյունից ևս մեկ անգամ վերահաստատում ենք պատրաստակամությունը՝ շարունակելու համատեղ ծրագրերի իրականացումը և նպատակաուղղված ու հետևողական աշխատանք տանել Եվրասիական տնտեսական ինտեգրման գաղափարների հանրահռչակման, միջազգային հեղինակության բարձրացման ուղղությամբ», - ասել է Փաշինյանը: Իր խոսքում ՀՀ վարչապետը կարևորել է համաշխարհային առևտրում ԵԱՏՄ և նրա անդամների շահերն ապահովող իրավական բազայի ձևավորման ուղղությամբ տարվող աշխատանքները: Փաշինյանը նաև նշել է, որ հայկական կողմը կարևորում է ԵԱՏՄ գազի ընդհանուր շուկայի ձևավորումը: «Անհրաժեշտ ենք համարում, որ միջազգային պայմանագրի շրջանակներում համաձայնեցվեն ոչ միայն Միության գազի ընդհանուր շուկայում գնանշումների և սակագների ձևավորման մոտեցումները, այլև սահմանվեն ներքին սպառման համար երրորդ երկրներից գազի փոխադրման սակագները՝ թափանցիկության և ոչ խտրական մոտեցման հիման վրա»,-նկատել է նա: ՀՀ կառավարության ղեկավարն իր խոսքում կարևորել է փոխադարձ առևտրում խոչընդոտների և սահմանափակումների բացահայտման և վերացման ուղղությամբ աշխատանքների շարունակականությունը: Եվ հավելել է, որ համաձայնեցված արտաքին առևտրային քաղաքականության իրականացման համար միասնական մոտեցումների ձևավորումը, որը համապատասխանում է յուրաքանչյուր անդամ պետության և ամբողջ ԵԱՏՄ-ի շահերին, առանցքային տարրերն են Եվրասիական տնտեսական ինտեգրման ապահովման գործում։