Ռուսաստանում կայցած Եվրասիական միջկառավարական խորհրդի նիստի շրջանակում Մոսկվայում փետրվարի 5-ին տեղի է ունեցել Հայաստանի և Ռուսաստանի վարչապետների՝ Հովիկ Աբրահամյանի և Դմիտրի Մեդվեդևի երկկողմ հանդիպումը:
Հայաստանի կառավարության մամլո ծառայությունից հայտնում են, որ այցի շրջանակում ստորագրվել է Հայաստանի տարածքում Մեծամորի ատոմային էլեկտրակայանի շահագործման ժամկետի երկարաձգման աշխատանքների ֆինանսավորման համար ՀՀ կառավարությանը վարկ տրամադրելու մասին համաձայնագիր: Հայկական կողմից համաձայնագիրը ստորագրել է Հայաստանի միջազգային տնտեսական ինտեգրման և բարեփոխումների նախարարի առաջին տեղակալ Սուրեն Կարայանը, ռուսական կողմից՝ ՌԴ ֆինանսների փոխնախարար Սերգեյ Ստորչակը:
Չնայած կառավարության հաղորդագրության մեջ չի նշվում վարկի չափի մասին, սակայն ըստ նախկինում շրջանառվող լուրերի՝ խոսքը գնում է մոտ 300 մլն ԱՄՆ դոլարի մասի: Վարկը հնարավորթյուն կտա ԱԷԿ-ում, որն ապահովում է Հայաստանում արտադրվող էլէկտրաէներգիայի մոտ 30%-ը և (հիդրոկայանների ու ջերմակայանների հետ միասին) հանդիսանում է երկրի էներգետիկ ոլորտի հիմնասյուներից մեկը, անցկացնել արդիականացման աշխատանքնենր և երկարաձգել ատոմակայանի շահագործման ժամկետը 10-15 տարի:
Մասնագետների կարծիքով, Մեծամորի ատոմակայանի արդիականացման աշխատանքների ֆինանսավորման համար տրամադրվող ռուսական վարկի կարևորությունը դժվար է գերագնահատել՝ հաշվի առնելով, որ Հայաստանի էներգետիկ սեկտորը ներկայում պատրաստ չէ ԱԷԿ-ի աշխատանքների դադարեցմանը կամ կոնսերվացիային, ինչը պնդում է մասնավորապես Եվրոպական միությունը:
Միևնույն ժամանակ հարկ է նշել, որ երկու երկրների կառավարությունների ղեկավարները հանդիպման ժամանակ բարձր են գնահատել հայ-ռուսական ռազմավարական հարաբերությունների ներկա մակարդակը և քննարկել համագործակցության ընդլայնմանն ու խորացմանն ուղղված հարցերի լայն շրջանակ:
Հայաստանի վարչապետ Հովիկ Աբրահամյանը մասնավորապես վստահություն է հայտնել, որ Եվրասիական տնտեսական միության ստեղծումը, որին այս տարվա հունվարից անդամակցում է նաև Հայաստանը, նոր խթան կհանդիսանա երկրների տնտեսությունների զարգացման և մրցունակության բարձրացման համար: Միևնույն ժամանակ նա հույս է հայտնել, որ մոտ ապագայում էապես կփոխվեն տնտեսական ցուցանիշները, մասնավորապես, կավելանան առևտրաշրջանառության և ներդրումների ծավալները: «Սա իր հերթին կնպաստի բնակչության կենսամակարդակի բարձրացմանը, նոր աշխատատեղերի ստեղծմանը»,- նշել է Հովիկ Աբրահամյանը:
Զրուցակիցներն անդրադարձել են տնտեսության մի շարք ոլորտներում փոխգործակցության զարգացմանը և այդ համատեքստում կարևորել Եվրասիական տնտեսական միության շրջանակում տարբեր բնագավառներում համատեղ ծրագրերի և նոր նախագծերի իրականացումը: Երկուստեք ընդգծել են, որ Հայաստանի ԵՏՄ-ին միանալը լայն հնարավորություն կստեղծի առևտրաշրջանառության աճի խթանման, նոր ներդրումների ներգրավման և նոր շուկաների ձեռքբերման համար:
Ռուսաստանի կառավարության մամլո ծառայության հաղորդագրության մեջ Աբրահամյան-Մեդվեդև հանդիպման մասին զետեղված է շատ ընդհանրական տեղեկատվություն՝ առանց կոնկրետ քննարկված հարցերի շրջանակի:
Ըստ ռուսական կողմի տրամադրած տեղեկատվության՝ Հովիկ Աբրահամյանը հանդպիման ժամանակ ամփոփ ներկայացնում է անցած տարվա երկու երկրների առևտրատնտեսական համագործակցության ցուցանիշները: «Առևտրատնտեսական համագործակցության ոլորտում մենք ունեցել են ոչ վատ ցուցանիշներ», - հայտարարել է Աբրահամյանը՝ գոհունակությամբ նշելով, որ 2014 թվականին Հայաստանի և Ռուսաստանի միջև արտաքին առևտրատնտեսական շրջանառության ծավալը կազմել է 1,5 մլրդ ամերիկյան դոլար, ինչը 3,2% գերեզանցում է 2013-ի ցուցանիշը:
Նշենք, որ պաշտոնական հաղորդարգությունների մեջ չի խոսվում այն մասին, արդոյք Աբրահամյան-Մեդվեդև հանդիպման ժամական քննարկել է Հայաստանին տրամադրվող ռուսական գազի դիմաց ռուսական ռուբլի վճարելու հարցը: Հաջողվել է քննարկել այս հարցը, ինչն Աբրահամյանի՝ մոսկովյան այցի նպատակներից մեկն էր, դեռ հայտնի չէ:
