Պատրաստ եմ լինել պարզ, բաց և անկեղծ հասարակության հետ. տնտեսության զարգացումը չունի այլ բանաձև, քան ստվերի դեմ պայքարելու ճանապարհը: Այս մասին ԱԺ-Կառավարություն հարց ու պատասխանի ժամանակ այսօր հայտարարեց ՀՀ նորանշանակ վարչապետ Կարեն Կարապետյանը: «Մենք դա փորձելու ենք անել: Կհաջողվի, թե՞ ոչ՝ վճռական ենք տրամադրված, որովհետև տնտեսության զարգացման ուրիշ ձև գոյություն չունի»,- շեշտեց նա: Ընդդիմադիր պատգամավոր Խաչատուր Քոքոբելյանի հարցին ի պատասխան, թե ինչպես է պայքարելու մենաշնորհների ու ստվերի դեմ, Կարեն Կարապետյանը նշեց, որ մենաշնորհները միշտ չեն վատը և եթե շուկան փոքր է, ապա խաղացողներից մեկը կարող է և մենաշնորհ դիրք ունենալ: «Այլ հարց է՝ դա բնական մենաշնորհ է, թե՞ ոչ»,- ընդգծեց նա: Նա նաև ավելացրեց, որ խնդիրներին մանրամասն ծանոթ չէ, մանրամասն կծանոթանա և նոր դրանց մասին կխոսի: Ավելի վաղ իր ելույթում Կարեն Կարապետյանը խոստովանել էր, որ ՀՀ տնտեսությունը չափազանց վատ վիճակում է:
