Հայաստանում Էլեկտրաէներգիայի թանկացման դեմ Բաղրամյան պողոտայում բողոքի ցույց անցկացնող ցուցարարներին այսօր ուշ երեկոյան այցելության եկավ ԱԻՄ առաջնորդ Պարույր Հայրիկյանը: Ցույցի մասնակիցները սուլոցներով դիմավորեցին Հայրիկյանին և նրա ուղեկիցներին, ովքեր բացի հայկական եռագույնից, իրենց հետ բերել էին նաև Եվրամիության դրոշներ: Ցուցարարները պահանջում էին իջեցնել Եվրամիության դրոշները, լսվում էին՝ «Սադրիչ», «Հեռացիր» և «Եռագո՛ւյն» կոչեր, հայտնում է Ազատություն ռադիոկայանը: Հարցին՝ ինչո՞ւ է եկել Եվրամիության դրոշներով, Պարույր Հայրիկյանը, ով Հայաստանի եվրասիական ինտեգրացիայի անհաշտ ընդդիմադիրներից է, պատասխանեց․ - «Որովհետև տղաները դիմել են Եվրոպական դատարան»: Ի վերջո Եվրամիության դրոշները հեռացվեցին և լարվածությունը Բաղրամյան պողոտայում նվազեց: Հիշեցնենք՝ հունիսի 23-ին Բաղրամյան պողոտայի վրա ոստիկանության կողմից էլեկտրաէներգիայի սակագնի բարձրացման դեմ նստացույցի մասնակիցների նկատմամբ ուժի կիրառումից տուժած 16 քաղաքացիներ շտապ կարգով հայց են ներկայացրել Մարդու իրավունքների եվրոպական դատարան։ Ռուսական Ինտեռ ՌԱՕ-ի 100%-ոց մասնաբաժնով դուստր ընկերություն համարվող "Հայաստանի էլեկտրական ցանցերը" մայիսի 8-ին Հանրային ծառայությունները կարգավոր հանձնաժողով է ներկայացրել էլեկտրաէներգիայի սակագները բարձրացնելու հայտ: Ընկերությունն առաջարկել է մեկ կիլովատ ժամի համար էլեկտրաէներգիայի սակագների այսօրվա 41.85 դրամի փոխարեն հասցնել 58.93 դրամի, իսկ գիշերայինը՝այսօրվա 31.85 դրամի փոխարեն հասցնել 48.93 դրամի: Հանձնաժողովը հունիսի 17-ի նիստին հայտը բավարարել է մասնակի: Նիստի արդյունքում որոշում է կայացվել սակագները բարձրացնել 17 դրամի փոխարեն 6.93 դրամով: Այդ որոշումն էլ բուռն մեծ հասարակական դժգոհություն է առաջացրել: Ընկերության պարտքը կազմում է 250 միլիոն դոլար: