ՀՔԾ-ն հոկտեմբերի 6-ին ձերբակալել էր գործարար, H2 հեռուստաընկերության սեփականատեր Սամվել Մայրապետյանին: Մինչ այսօր պատկան մարմինը որևէ մեկնաբանությամբ հանդես չի եկել, թե ինչ գործի շրջանակում է Մայրապետյանը ձերբակալվել: Այսօր, սակայն, հայտնի դարձան գործի որոշ մանրամասներ: Մասնավորապես, Հատուկ քննչական ծառայությունը Սամվել Մայրապետյանի նկատմամբ մեղադրանք է առաջադրել ՀՀ քրեական օրենսգրքի 38-311 հոդվածի հատկանիշներով՝ կաշառք ստանալու օժանդակություն: Այս մասին տեղեկացրեց ՀՔԾ խոսնակ Մարինա Օհանջանյանը։ Մայրապետյանի պաշտպան Կարեն Բատիկյանն էլ հայտնեց, որ Երևանի ընդհանուր իրավասության դատարանում քննվում է գործարար Սամվել Մայրապետյանի նկատմամբ խափանման միջոց ընտրելու վերաբերյալ նախաքննական մարմնի կողմից ներկայացված միջնորդությունը: Պաշտպանի խոսքով, Մայրապետյանն իրեն առաջադրված մեղադրանքը չի ընդունում:
