Հայաստանի Հանրապետության կառավարությունը մայիսի 21-ին կայացած նիստում հավանություն է տվել Աշխատանքային օրենսգրքում փոփոխություններ և լրացումներ կատարելու նախագծին, որը նախատեսում է աշխատանքային հարաբերություններում «ծնողական ժամի» գաղափարի ներդրում: Որոշումը միտված է աշխատող ծնողների սոցիալական պաշտպանության բարձրացմանը և տարածվելու է ինչպես պետական, այնպես էլ մասնավոր հատվածների գործատուների վրա։ Նոր կարգավորումներով սահմանվում է, որ խնամքին մինչև 12 տարեկան, ինչպես նաև մինչև 18 տարեկան հաշմանդամության խորը կամ ծանր սահմանափակում ունեցող երեխա ունեցող ծնողները (ներառյալ՝ խնամատար ծնողները, որդեգրողները և խնամակալները) իրավունք կունենան բացակայել աշխատանքից՝ պահպանելով աշխատավարձը: Տրամադրվող ժամանակահատվածը բաշխվելու է հետևյալ սկզբունքով. մինչև 2 երեխա ունեցող ծնողներին՝ օրական առավելագույնը 30 րոպե, 3 և ավելի երեխա ունեցող ծնողներին՝ օրական առավելագույնը 1 ժամ: Իսկ Հաշմանդամություն ունեցող երեխայի ծնողներին՝ օրական առավելագույնը 1 ժամ (անկախ երեխաների ընդհանուր թվից): Նշվում է նաև, որ այս իրավունքը հավասարապես վերաբերելու է երկու ծնողներին էլ: Կիրարկման պայմաններն ու առաջիկա բարեփոխումներըԿառավարության նիստի ընթացքում պարզաբանվել է, որ ներկա փուլում ժամերի կուտակման հնարավորություն չի նախատեսվում: Աշխատակիցները չեն կարողանա ամենօրյա ազատ ժամերը գումարել իրար՝ լրիվ ազատ օր ստանալու նպատակով: Սակայն նոր դրույթը կգործի առկա օրենսդրությանը զուգահեռ. օրինակ՝ խնամքի արձակուրդից վերադարձած և մինչև 2 տարեկան երեխա ունեցող մայրերը, ովքեր արդեն իսկ ունեն օրական 1 ժամ պակաս աշխատելու իրավունք, կկարողանան գումարել այդ արտոնությունները և բացակայել օրական մինչև 2 ժամ։ Նիստի ժամանակ բարձրաձայնվել են նաև հնարավոր ռիսկերը: Մասնավորապես, մտահոգություն է հնչել, որ վճարովի ազատ ժամ տրամադրելու պարտադրանքը կարող է ստիպել մասնավոր գործատուներին խուսափել հաշմանդամություն ունեցող երեխաներ խնամող ծնողներին աշխատանքի ընդունելուց: Որպես լուծում՝ առաջարկվել է մշակել պետական խրախուսման մեխանիզմներ (օրինակ՝ հարկային արտոնությունների տեսքով), որոնք կքննարկվեն Ազգային ժողովում՝ լսումների փուլում։ Թվայնացման հեռանկարը Կառավարությունը հայտնել է, որ ապագայում, երբ Հայաստանում ամբողջությամբ կներդրվի աշխատանքային պայմանագրերի թվայնացման պլատֆորմը, հնարավոր կլինի վերանայել օրենքը և այն դարձնել ավելի ճկուն: Թվային համակարգը թույլ կտա կառավարել ժամերի կուտակումը և դրանց վերաբաշխումը ծնողների միջև։ Նախագիծը գործադիրի կողմից հաստատվելուց հետո կուղարկվի ՀՀ Ազգային ժողով՝ վերջնական քվեարկության:
