Երևանում Մեծ Բրիտանիայի դեսպանատունը հանդես է եկել հայտարարությամբ՝ նախօրեին դեսպանատան մոտ տեղի ունեցած բողոքի ակցիայի վերաբերյալ: Հայտարարության մեջ նշվում է, որ Մեծ Բրիտանիան մտահոգված է ղարաբաղյան հակամարտության գոտում բռնությունների աճով և կոչ է անում կողմերին գործել միջնորդական ԵԱՀԿ Մինսկի խմբի շրջանակներում: Երևանում Մեծ Բրիտանիայի դեսպանատան դեմ անցկացված ակցիան ուղղված է ԵԽԽՎ-ում բրիտանացի պատգամավոր Ռոբերտ Ուոլթերի նախաձեռնած հակահայկական «Լեռնային Ղարաբաղում և Ադրբեջանի այլ օկուպացված տարածքներում» զեկույցի դեմ: Միջոցառումը կազմակերպել էր «Հանուն օրենքի» հասարակական շարժումը: Դեսպանատան մուտքի մոտ ցուցարարներին ընդառաջ է դուրս եկել դեսպանի տեղակալ Էմայզ Մորզը: Ակտիվիստները նամակ են փոխանցել դիվանագետին, որտեղ իրենց բողոքն են հայտնել Մեծ Բրիտանիայի ներկայացուցիչների արդբեջանամետ դիրքորոշման դեմ, որն ուղղված է Ադրբեջանին ագրեսիվ ձգտումների աջակցմանը: Ակտիվիստները նաև պահանջել են Մեծ Բրիտանիայի իշխանություններից հետ կանչել Ռոբերտ Ուոլթերին ԵԽԽՎ-ից: Որպես խորհրդանշական ժեստ ցուցարարներն իրենց հետ սև և կարմիր խավիար են բերել՝ դրանով ակնկարկելով, որ ԵԽԽՎ-ի շատ պատգամավորներ դարձել են Ադրբեջանի խավիարային դիվանագիտության զոհը: Դեսպանատան պատասխան հայտարարության մեջ նշված է, որ Միացյալ Թագավորությունը խրախսում է ԵԱՀԿ Մինսկի խմբի շրջանակներում բանակցությունների առաջընթացին և Եվրոպայի Խորհրդի և նրա բաղկացուցիչ կառույցների ջանքերին այդ շրջանակներում:
