Ռուբեն Վարդանյանը հրաժարական չի տա, պաշտոնանկության դեպքում Արցախից չի հեռանա: Այս մասին «Ազատության» եթերում հայտարարել է «Ապրելու երկիր» կուսակցության համահիմնադիր, Արցախի պետնախարարի խորհրդական Մեսրոպ Առաքելյանը։ Նա նշել է, որ Վարդանյանի հեռանալու մասին խոսակցությունները նոր չեն, դրանք տարածվում են նրա պաշտոնը ստանձնելուց սկսած, և հստակ է, որ Ռուբեն Վարդանյանը չի պատրաստվում հրաժարական տալ, ինչպես նաև հեռանալ Արցախից: «Ռուբեն Վարդանյանի դիրքորոշումը Արցախում պաշտոն զբաղեցնելով չի պայմանավորված։ Եվ անկախ նրանից, թե քաղաքական որևէ փոփոխություն կլինի, թե՝ ոչ, Վարդանյանն անելու է առավելագույնը առկա մարտահրավերներին դիմակայելու»,- շեշտել է Առաքելյանը: Հիշեցնենք, ըստ մամուլի՝ փետրվարի 23-ին Արցախի նախագահ Արայիկ Հարությունյանը հանդես կգա ուղերձով, որով կհայտարարի, որ Ռուբեն Վարդանյանը հեռանում է պաշտոնից: Նախօրեին Արցախի գլխավոր դատախազ Գուրգեն Ներսիսյանն ասել էր, որ ստացել է Արցախի պետական նախարարի պաշտոնը ստանձնելու առաջարկ, բայց դեռ որոշում չունի:
