Համաձայն «Դեմոկրատական այլընտրանք» կուսակցության ս/թ հունվարի 26-ի հայտարարության, ինչպես նաև ամփոփելով մինչև փետրվարի 20-ը շահագրգիռ ուժերի և գործիչների հետ տեղի ունեցած քաղաքական քննարկումները, «Դեմոկրատական այլընտրանք» կուսակցությունը ՀԱՅՏԱՐԱՐՈՒՄ Է Ուժի մեջ թողնելով ԴԱԿ հունվարի 26-ի հայտարարության գործողությունների ծրագրի Քայլ Ա կետի էությունը, այն է՝ աջակցել «Քաղաքացիական պայմանագիր» կուսակցությանը Նիկոլ Փաշինյանին փոխելու հնարավոր նախաձեռնության հարցում, «Դեմոկրատական այլընտրանք» կուսակցությունը համախոհ քաղաքական ուժերի և անհատ գործիչների հետ սկսում է ՀՀ վարչապետի պաշտոնը զբաղեցնող Նիկոլ Փաշինյանի հեռացման գործընթացը։ Այդ, ինչպես նաև ԱԺ արտահերթ ընտրություններ անցկացնելու անհրաժեշտությունն իրատեսական դարձնելու նպատակով առաջադրվել է մինչև փետրվարի 28-ը կազմավորել միացյալ շտաբ և քաղաքական կոմիտե՝ գործողությունների երկու ուղղությամբ. ա) կազմակերպչական՝ քարոզչական և մեդիառեսուրսների համախմբման, բ) քաղաքական՝ ստվերային կառավարության կազմավորելու։ ԴԱԿ քաղաքական խորհուրդը որոշեց նաև մինչև վերոնշյալ ժամկետը համախոհ քաղաքական, հասարակական ուժերի և անհատներ հետ քննարկել. ա) Նիկոլ Փաշինյանի հեռացման ամբողջական գործընթացը «Նիկոլափոխություն» կարգախոսով անցկացնելու, բ) ստեղծվող միացյալ շտաբն ու կազմկոմիտեն «Պետականություն» անվանելու, գ) «Պետականություն» կոմիտեի և շտաբի գործունեության մասին հանրությանը տեղեկացնելու պարբերականության մասին հարցերը։