Թրամփի ռազմավարությունը. Չինաստանը եւ ՌԴ-ն մարտահրավեր են ԱՄՆ ազդեցությանն ու շահերին
Միացյալ Նահանգները կարձագանքեն աշխարհի աճող քաղաքական, տնտեսական եւ ռազմական մրցումներին: Այս մասին ասվում է Միացյալ Նահանգների Ազգային անվտանգության ռազմավարությունում, որը ներկայացրել է Նախագահ Դոնալդ Թրամփը:
Ինչպես Facebook-ի իր էջում գրում է ԱՄՆ Թաֆթս համալսարանի Ֆլետչերի իրավունքի և դիվանագիտության դպրոցի գիտաշխատող, քաղաքագետ Սուրեն Սարգսյանը, հրապարակված ռազմավարությունը լուրջ փաստաթուղթ է, որը կառուցված է 4 հիմնական սկզբունքի վրա։ Դրանք են.
1. Հայրենիքի, ամերիկացի ժողովրդի և կենսակերպի պաշտպանություն։2. Ամերիկյան բարգավաճման տարածում,3. Խաղաղության ապահովումը հզոր լինելու միջոցով,4. Ամերիկյան ազդեցության տարածումը։
Նրա խոսքով, ըստ այդ փաստաթղթի՝ ԱՄՆ-ի ազգային անվտանգության հիմնական սպառնալիքներն են.
1. Ռեգիոնալ բռնապետությունները,2. Ահաբեկչական խմբավորումները,3. Ռեվիզիոնիստական պետությունները՝ Ռուսաստանի և Չինաստանի օրինակով, որոնք սպառնում են ամերիկյան արժեքներին։
Նշվում է, որ Չինաստանը եւ Ռուսաստանը մարտահրավեր են նետում ԱՄՆ իշխանությանը, ազդեցությանը եւ շահերին՝ փորձելով խաթարել ամերիկյան անվտանգությունն ու բարգավաճումը:«Նրանք վճռական են, որպեսզի տնտեսությունը ավելի քիչ ազատ ու արդար դարձնեն, զինված ուժերը ավելացնեն, հասարակության ճնշման եւ դրանց ազդեցության ընդլայնման համար վերահսկեն տեղեկատվությունը եւ տվյալները»:Չինաստանը եւ Ռուսաստանը զարգացնում են ժամանակակից զենքեր եւ հնարավորություններ, որոնք կարող են սպառնալ Միացյալ Նահանգների կառավարման ձեւին, վերահսկողությանը, ենթակառուցվածքներին:Ռուսաստանը միջամտում է աշխարհի բոլոր երկրների ներքին քաղաքական գործերին: Ռուսական հավակնությունների եւ աճող ռազմական կարողությունների համադրումը Եվրասիայում անկայուն սահմաններ է ստեղծում, որտեղ ռուսական սխալների պատճառով հակամարտությունների վտանգն աճում է: