Հայաստանում եւս 284 դպրոցներում «Արմաթ» լաբորատորիաներ կբացվեն. 834 մլն դրամ հատկացվեց

Կառավարությունն իր այսօրվա՝ հուլիսի 4-ի նիստում որոշում կայացրեց 834 մլն դրամ հատկացնել հայաստանյան դպրոցներում ռոբոտատեխնիկական լաբորատորիաներ ստեղծելու նպատակով:

Հարցը ներկայացրեց ԿԳ, մշակույթի եւ սպորտի նախարար Արայիկ Հարությունյանը՝ նշելով, որ գումարը հատկացվելու է Առաջատար տեխնոլոգիաների ձեռնարկությունների միությանը. ստեղծվելու է 284 լաբորատորիա նույնքան դպրոցներում:

Նախարարի խոսքով, արդեն այսօր Հայաստանի դպրոցներում գործում են մոտ 350 նման լաբորատորիաներ. «Հետազոտությունները ցույց են տալիս, որ ռոբոտաշինության ու ինժեներական ու տեխնոլոգիական մտքի զարգացման համար սա լավ ներդրում է, հետագայում ազդեցություն են ունենալու տնտեսության վրա»,-ասաց Արայիկ Հարությունյանը՝ հավելելով, որ հաջորդ անգամ այս լաբորատորիաների ստեղծման համար կհայտարարվի մրցույթ, որին կմասնակցեն նաև այլ կազմակերպություններ։

Փոխվարչապետ Տիգրան Ավինյանը նշեց, որ այս աշխատանքները պետք է շարունակական լինեն, եւ այս տարի այդ թիվը պետք է հասցնել 470-500-ի, ինչին Արայիկ Հարությունյանն արձագանքեց, որ հաջորդ տարի 650 լաբորատորիաների մասին է խոսքը վերաբերելու:

Տիգրան Ավինյանի խոսքով, սա հնարավոր է դարձել բյուջեի հավելյալ հավաքագրումների արդյունքում: