Իրանը չի ընդունի ճնշման տակ բանակցություններ վարելու ԱՄՆ-ի առաջարկը

Իրանը չի ընդունի ճնշման տակ բանակցություններ վարելու ԱՄՆ-ի առաջարկը։ Այս մասին հայտարարել է ՄԱԿ-ում Իրանի դեսպան Մաջիդ Տախտ Ռավանչին։

«ԱՄՆ-ը Իրանի վրա ճնշում է գործադրում եւ չի կարող ակնկալել, որ երկիրը կընդունի բանակցություններն այդ իրավիճակում»,- ասել է նա։

CNN-ին տված հարցազրույցում դիվանագետը, մեկնաբանելով Իրանի կողմից «սպառնալիքների» համար Պարսից ծոց ավիակիր ուղարկելու Վաշինգտոնի որոշումը, հայտարարել է, որ այդ ամբողջ տեղեկատվությունը «ֆեյքային» է եւ հիմնված է կարճատեսական տեսակետի վրա»։

Մեկնաբանելով Մերձավոր Արեւելք 120 հազարանոց բանակ ուղարկելու ԱՄՆ-ի ծրագրերը՝ Ռավանչին նշել է․ «Սա հոգեբանական պատերազմ է։ Մենք լարվածություն չենք ուզում, քանի որ ոչ ոք չի շահի»։

Նա ընդգծել է, որ Իրանը ջերմ հարաբերություններ է պահպանում իր հարեւանների հետ եւ ուղղակի պաշտպանում է Պարսից ծոցում իր առավելություններն ու անվտանգությունը։

Դեսպանը հավելել է, որ Իրանը համբերատար է եղել վերջին տարվա ընթացքում եւ միջուկային համաձայնագրից ԱՄՆ-ի դուրս գալուց հետո, սակայն որոշակի արդյունք չի ստացել։ Այդ պատճառով Թեհրանը որոշել է երկու ամսով դադարեցնել իր պարտավորությունները՝ տեսնելու համար, թե ինչ կլինի ապագայում։

Նա կրկնել է, որ Իրանը մտադիր չէ միջուկային ռումբ ստեղծել, քանի որ դա իսլամի կանոնների խախտում է եւ հակասում է Իրանի առաջնորդի հրամանին։