ՀՀ-ն՝ խաղաղության սպասումով, Ալիևը հանձնարարում է հատուկ տեխմիջոցների ավելի լայն կիրառում

Պաշտոնական Բաքուն պատրաստ է կառուցողական բանակցություններին ու շփումներին, որոնք միտված կլինեն հայ-ադրբեջանական հակամարտության կարգավորմանը: Այս մասին Ազերթաջի հետ զրույցում ասել է Ադրբեջանի ԱԳՆ պաշտոնական ներկայացուցիչ Հիքմեթ Հաջիևը:

«Դուշանբեում Իլհամ Ալիևի և ՀՀ վարչապետ Նիկոլ Փաշինյանի միջև զրույցը տեղի է ունեցել Փաշինյանի նախաձեռնությամբ: Սա ևս մեկ անգամ ցույց է տալիս, որ բանակցությունների ձևաչափը մնում է անփոփոխ և բանակցություններն ընթանում են հենց Հայաստանի և Ադրբեջանի միջև, որոնք էլ հանդիսանում են հակամարտության կողմեր», —ասել է Հաջիևը:

Հիշեցնենք, Դուշանբեից վերադառնալուց հետո Նիկոլ Փաշինյանը տեղեկացրեց, որ Իլհամ Ալիևի հետ պայմանավորվել են երկրների  Պաշտպանության նախարարություններին հանձնարարություն տալ կոնկրետ քայլեր ձեռնարկել սահմանագծում եւ ընդհանրապես առկա լարումն իջեցնելու վերաբերյալ, որակելով դրանք սահմանային միջադեպերը կանխելուն ուղղված քայլեր: 

Մինչդեռ շաբաթ օրը, այսինքն այս պայմանավորվածություններից հետո, Ադրբեջանի պաշտպանության նախարարը անձնակազմին է ներկայացրել Ալիևի հանձնարարականները, որոնք հիմնված են առաջնագծում իրավիճակի վերջին վերլուծությունների վրա: Ըստ այդմ, հակառակորդ երկրի ղեկավարը հանձնարարել է շեշտադրել «ավելի լավ ռազմական հերթափոխն իրականացնելը և  հատուկ տեխնիկական միջոցների ավելի լայն կիրառումը շփման գծում, ինչը միտված պետք է լինի անձնակազմի անվտանգության ապահովմանը»: