ՀՀԿ խորհուրդն «արտագաղթել է» Ծաղկաձոր. Փաշինյանն իր համախոհներով ավտոերթով կմենկի այնտեղ

362

Իշխող Հայաստանի հանրապետական կուսակցության ապրիլի 14-ի խորհրդի նիստը, որի ժամանակ առաջադրվելու է Սերժ Սարգսյանի թեկնածությունը վարչապետի պաշտոնում, կայանալու է Ծաղկաձոր քաղաքում:


Այս մասին ֆեյսբուքյան իր էջից ուղիղ հեռարձակման ընթացքում հայտարարել է Ֆրանսիայի հրապարակում նստացույց իրականացնող ԱԺ ԵԼՔ խմբակցության ղեկավար, "Քաղաքացիական պայմանագիր" կուսակցության առաջնորդ պատգամավոր Նիկոլ Փաշինյանը՝ հավելելով, որ պատրաստվում են ավտոերթ իրականացնել դեպի Ծաղկաձոր:


Երեւանի կենտրոնում՝ Ֆրանսիայի հրապարակում, Սերժ Սարգսյանի վարչապետության դեմ իր համախոների հետ շուրջօրյա բողոքի ակցիա սկսած Նիկոլ Փաշինյանը հայտարարել էր, որ «Քաղաքացիական պայմանագիր» կուսակցության «Իմ քայլը» նախաձեռնության անդամներն ապրիլի 14-ի շրջափակելու են ՀՀԿ գլխամասային գրասենյակը, որտեղ տեղի է ունենալու կուսակցության խորհրդի նիստը եւ ներկայացվելու է Սարգսյանի թեկնածությունը:


«ՀՀԿ խորհուրդն «արտագաղթել է» Ծաղկաձոր, մենք պատրաստվում ենք ավտոերթ կազմակերպել այս ուղղությամբ: Կոչ եմ անում բոլոր ցանկացողներին իրենց մեքենաներով ժամը 16:30-ին հավաքվել Ավան վարչական շրջանում «Հարսնաքար» ռեստորանային համալիրի հարակից տարածքում, որտեղից կշարժվենք դեպի Ծաղկաձոր», - ասել է Փաշինյանը:


Նա հայտնել է նաև, ժամը 14։00-ին հանրահավաք տեղի կունենա Ֆրանսիայի հրապարակում։


Ավելի վաղ, «Իմ քայլը» և «Մերժիր Սարժին» նախաձեռնությունները, որոնք ապրիլի 13-ից ցույցեր են սկսել Սերժ Սարգսյանի վարչապետությունը թույլ չտալու նպատակով, փակել են Ֆրանսիայի հրապարակը։


Մինչ այդ «Իմ քայլը» նախաձեռնության անդամները 14 օր տևած քայլարշավից հետո հասել էին Երևանի Հյուսիսային ավտոկայան, որտեղից Ազատության պողոտայով շարժվել են դեպի Ազատության հրապարակ, որտեղ ազդարարվեց ընդդիմության քառօրյա հանրահավաքների սկիզբը։

Տպել

Թեմայի այլ նորություններ