Դա ուղղակի զավեշտ է. ԱԳ փոխնախարարը` եվրոպացի պատգամավորների նկատմամբ քրգործերի հարուցման մասին

Արդեն վաղուց Ադրբեջանի իշխանություններն ամեն ինչ զավեշտի են վերածում՝ թե՛ միջազգային իրավունքը, թե՛ նույնիսկ իրենց ներքին կյանքը։ Այս մասին կառավարության նիստից հետո լրագրողների հետ ճեպազրույցում ասաց ՀՀ արտաքին գործերի փոխնախարար Շավարշ Քոչարյանը` մեկնաբանելով Եվրախորհրդարանի պատգամավորներ Ֆրանկ Էնգելի, Յարոմիր Շտետինայի և Էլենի Թեոխարուսի նկատմամբ Ադրբեջանի կողմից միջազգային հետախուզում հայտարարելու հայտարարությունը:

«Դա ուղղակի զավեշտ է, և որևէ կերպ չի կարող ազդել դեպի Արցախ այցելությունների վրա»,- նշեց Քոչարյանը։

Նման կարծիք ունի նաև Արցախի Հանրապետության Մարդու իրավունքների պաշտպան Ռուբեն Մելիքյանը, ով VERELQ-ի հետ զրույցում ասաց, որ բլոգեր Ալեքսանդր Լապշինի ձերբակալությունն ու արտահանձնումը Ադրբեջանին նպատակ էր հետապնդում իրավական նախադեպ դառնալու, սակայն հակառակը տեղի ունեցավ` Արցախի հանդեպ հետաքրքրությունն աճել է և անցած հանրաքվեին մասնակցությունը դրա ապացույցն է:

Նշենք, որ եվրոպացի պատգամավորները այցելել են Արցախի Հանրապետություն ու հետևել անցկացվող Սահմանադրական հանրաքվեին: Ոստիկանության մամուլի ծառայության ղեկավար Աշոտ Ահարոնյանը հայտնել է, որ ներկայում Ինտերպոլում նման տվյալներով անձինք հետախուզման մեջ չեն: