Մեհրիբան Ալիևան` առաջին փոխնախագահ. Ադրբեջանում ամրապնդվում է ընտանեկան–կլանային իշխանությունը

Մեհրիբան Ալիևան նշանակվել է Ադրբեջանի Հանրապետության առաջին փոխնախագահ։ Համապատասխան հրամանագիրը ստորագրվել է Ադրբեջանի նախագահ Իլհամ Ալիևի կողմից։ Ադրբեջանում սեպտեմբերի 26–ին տեղի է ունեցել հանրաքվե, որի արդյունքներով նախագահի լիազորությունները հինգ տարուց երկարաձգվում է մինչև յոթ տարի, ինչպես նաև մտցվում է փոխնախագահի պաշտոն։

Նախագահի հրաժարականի դեպքում`մինչև նոր նախագահի ընտրությունները նրա լիազորությունները կատարելու է ոչ թե վարչապետը, այլ`ըստ նոր փոփոխությունների, առաջին փոխնախագահը։

Ռազմավարական մտքի կենտրոնի ղեկավար Իսա Ղամբարը հայտարարել է, որ իրենք կանխատեսումները կապված անիմաստ հանրաքվեի հետ արդարացան, փոխանցում է contact.az–ը։ Նա նշել է, որ այդ հանրաքվեի նպատակն է օրինականացնել երկրում ընտանեկան, կլանային համակարգը։ Այդ քայլն Ադրբեջանը հետ է մղում դեպի միջին դարեր։

Ղամբարի խոսքով, միջազգային ռեակցիան այդ քայլին լինելու է բացասական։

Ժողովրդական ճակատի ղեկավար Ալի Քերիմլին հայտարարել է, որ Մեհրիբան Ալիևայի նշանակումը փաստացի ձևակերպեց Ադրբեջանում ձևավորված ընտանեկան իշխանությունը։

Նա նշել է, որ երբ փոխում էին սահմանադրությունը, դա արվում էր ընտանեկան ամբիացիաները բավարարելու համար։ Ըստ նրա, սկզբում սահմանադրությունը փոխում էին Իլհամ Ալիևի համար ճանապարհ հարթելու համար, այժմ դա անում են, որպեսզի նա իշխանությունը հեշտությամբ փոխանցի ընտանիքի անդամներին։