Վրաստանի վարչապետ Իրակլի Ղարիբաշվիլին հինգշաբթի օրը քաղաքացիներին ուղղված հատուկ ուղերձում հայտարարել է, որ ստորագրում է ԵՄ անդամակցության դիմումը։ «Այսօր պատմական օր է Վրաստանի համար. երկրի անունից ստորագրում եմ Եվրամիությանն անդամակցելու դիմումը»,- ասել է նա, որից հետո ստորագրել է փաստաթուղթը, փոխանցում է Sputnik-ը։ VERELQ-ը հիշեցնում է, որ Վրաստանի նախագահ Սալոմե Զուրաբիշվիլին նախօրեին հայտարարել էր, որ Եվրամիությունը պետք է ակտիվ քայլեր ձեռնարկի ԵՄ-ին Վրաստանի միանալու հարցը լուծելու համար։ «ԵՄ-ն պետք է ճանապարհ գտնի արձագանքելու մեր երկար սպասումին, որպեսզի մենք զգանք, որ նրա ընտանիքի մի մասն ենք։ Սրան սպասում ենք այնքան, որքան Ուկրաինան։ Մեզ հետ պետք է հաշվի նստեն և մեզ չպետք է մոռանան»,- ասել էր Վրաստանի նախագահը։
