Թուրքիայի հետ սկսված փակ և գաղտնի գործընթացը չի ծառայելու Հայաստանի շահերին. Մինասյան

«Հայաստան» խմբակցության քարտուղար Արծվիկ Մինասյանը վստահ է, որ Թուրքիայի հետ սկսված փակ եւ գաղտնի գործընթացը չի ծառայելու Հայաստանի ազգային շահերին:

Մեկնաբանելով Թուրքիայի ԱԳՆ ղեկավարի հայտարարությունը հարաբերությունների կարգավորման գործընթացն սկսելու համար հատուկ դեսպանորդներ ուղարկելու մասին, Մինասյանը նշել է, որ այդ հայտարարության վերաբերյալ գնահատականները պետք է պահանջել Հայաստանի իշխանություններից, որոնք հայտարարում են Թուրքիայից դրական ազդակների եւ Ադրբեջանի նախագահի կառուցողականության մասին: «Ակնհայտ է, որ դա չի ծառայելու մեր ազգային նպատակներին։ Չի լինի», - հայտարարեց պատգամավորը։

Նա ընդգծել է, որ ընդդիմությունը դեմ չէ Թուրքիայի հետ բարիդրացիական հարաբերություններ հաստատելուն, եթե այդ գործընթացը որևէ նախապայմանի հետ չի կապվում։ «Բայց ինչպես կարելի է խոսել այն պետության հետ բարիդրացիական հարաբերությունների մասին, որը ցանկանում է ոչնչացնել Հայաստանը։ Անհրաժեշտ է պաշտպանել իր շահերը։ Չպահպանելով իր ազգային շահերը, չապահովելով մեր ժողովրդին պատուհասած աղետի ճանաչումը՝ առանց այդ ոճրագործության հետևանքների վերացման, ինչ բարիդրացիական հարաբերությունների մասին կարող է խոսք լինել», - վրդովվեց Մինասյանը։

Ընդդիմադիրը նշել է, որ Թուրքիան խոսել և շարունակում է խոսել նախապայմանների լեզվով։ Նախկինում առաջադրված 3 պայմաններից մեկը թուրքական կողմը չեզոքացված է համարում։ Խոսքը Արցախի խնդրի մասին է, որը Թուրքիայում լուծված են համարում։ Երեւանի մասնակցությունը Թուրքիայի հետ հարաբերությունների կարգավորման շուրջ երկխոսությանը նշանակում է, որ հայկական կողմը եւս այդ տեսակետն ունի։

Մինասյանը չի հավատում թուրքական կողմի մտադրությունների անկեղծությանը։ «Եթե նրանք պատրաստ էին գնալ հարաբերությունների կարգավորման, ինչու դա չարեցին մինչև Արցախի դեմ պատերազմը, երբ մենք ավելի ուժեղ դիրքեր ունեինք», - հարց տվեց Մինասյանը։