Էրդողանը չի հարգում Ուկրաինան, այլ օգտագործում է իր նպատակների համար. Ռադայի պատգամավոր

Թուրքիայի նախագահ Ռեջեփ Թայիփ Էրդողանը չի հարգում Ուկրաինան, այլ միայն օգտագործում է երկիրն իր շահերից ելնելով։ Այս մասին հայտարարել է Ուկրաինայի Գերագույն ռադայի պատգամավոր Օլեգ Վոլոշինը, հաղորդում է «ՌԻԱ նովոստին»:

Որպես օրինակ պատգամավորը մեջբերել է Ուկրաինայի ԱԳ նախարար Դմիտրի Կուլեբայի հետ զրույցը, որը նրան խոստացել էր, որ Թուրքիայի առաջնորդը կայցելի «Ղրիմի պլատֆորմ»:

«Էրդողանը պետք է «Ղրիմի պլատֆորմում» լիներ, անձամբ ինձ Կուլեբան այդ մասին ասել է։ Ես նրան դեռ դրանով կշտամբել եմ, որ դուք այդ ամենն անում եք Էրդողանի համար։ Նա ասում է. «ոչ, Էրդողանը պարզապես առաջինն է հաստատել մասնակցությունը»։ Եւ չի եկել ու չի բացատրվել», - հայտարարել է Վոլոշինը «112 Ուկրաինա» հեռուստաալիքի եթերում։

Նա ուշադրություն է հրավիրել այն հանգամանքի վրա, որ միևնույն ժամանակ Թուրքիայի նախագահը մոտ ժամանակներս կհանդիպի Ռուսաստանի նախագահ Վլադիմիր Պուտինի հետ։

«Ահա Ուկրաինայի հանդեպ վերաբերմունքը: Գնեք մեր «Բայրաքթարները», թող մեր ընկերությունները ճանապարհներ կառուցեն, քանի որ լավ ատկատներ են տալիս, բայց ձեզ առանձնապես չենք հարգի», - եզրափակել է խորհրդարանականը: