Աֆղանստանի սահմանը Ուզբեկստանի և Տաջիկստանի հետ վերահսկում են թալիբները, ՀԱՊԿ-ն պետք է պատրաստ լինի ահաբեկիչների հնարավոր ներթափանցմանը, հայտարարել է ՌԴ պաշտպանության նախարար Սերգեյ Շոյգուն, փոխանցում է «ՌԻԱ Նովոստի»-ն:
«Մեզ համար կարեւորն այն է, որ Ուզբեկստանի եւ Տաջիկստանի հետ սահմանը նույնպես վերահսկողության տակ է վերցվել «Թալիբանի» կողմից։ Բոլոր անցակետերը և այն սպառնալիքները, որոնք Աֆղանստանից առաջ էին գալիս, նարկոթրաֆիկ է, ահաբեկիչների ներթափանցումն է մեր երկիր Տաջիկստանի, Ղրղըզստանի, Ուզբեկստանի տարածքով, և, իհարկե, դրանից սպառնալիքները չեն նվազում», - ասել է նա «Մտքերի տարածք» երիտասարդական համաժողովում:
Տաջիկստանի եւ Ուզբեկստանի զինված ուժերը, նախարարի խոսքով, պետք է պատրաստ լինեն «Թալիբանի» կողմից հնարավոր սադրանքներին, չնայած այդ շարժման կողմից նման փորձեր չձեռնարկելու հավաստիացումներին:
Շոյգուն նշել է, որ Ռուսաստանի համար կարեւոր է, որ ՀԱՊԿ-ի գծով դաշնակիցները պատրաստ լինեն թալիբների կողմից հնարավոր սադրանքներին: «Դրա համար մենք, բնականաբար, ամեն ինչ անում ենք», - հավելել է նա։
Նախարարը նաեւ հիշեցրել է Տաջիկստանում եւ Ղրղզստանում ռուսական ռազմակայանների մասին: «Ուզբեկստանի, Տաջիկստանի եւ Ղրղզստանի, Ղազախստանի սպաների մեծ մասը ուսում են անցնում մեր բարձրագույն ուսումնական հաստատություններում։ Մենք զբաղվում ենք նաեւ Տաջիկստանի, Ղրղզստանի բանակի արդիականացմամբ», - նշել է Շոյգուն։
Աֆղանստանում առաջին տարին չէ, որ շարունակվում է կառավարական ուժերի դիմակայությունը զինյալների հետ։ Վերջին ամիսներին թալիբները զգալի տարածքներ են գրավել գյուղական եւ սահմանային շրջաններում եւ հարձակումներ են ծավալել խոշոր քաղաքների վրա: Էսկալացիան տեղի է ունենում ամերիկյան զորքերի դուրսբերման ֆոնին, որը Ռուսաստանի ԱԳՆ-ն անվանել է Աֆղանստանում ԱՄՆ առաքելության ձախողման ընդունում:
Օգոստոսի 6-ին թալիբները հայտարարել են Աֆղանստանի հարավ-արեւմուտքում Նիմրոզ նահանգի վարչական կենտրոնի՝ Զարանջ քաղաքի գրավման մասին: Դրանից հետո նրանք հայտարարել են Աֆղանստանի 34 Նահանգներից եւս 5-ը, այդ թվում՝ Կունդուզ քաղաքը վերահսկողության տակ վերցնելու մասին:
Արևմտյան ԶԼՄ-ների կարծիքով՝ Կունդուզի անցումը ապստամբների հսկողության տակ կարող է բեկում նշանակել Աֆղանստանում իրավիճակի զարգացման գործում։ Ընդ որում պաշտոնական Քաբուլը հերքել է քաղաքի նկատմամբ վերահսկողությունը կորցնելու մասին տեղեկությունը։
