Ռուսական կողմի հետ քննարկում ենք Գեղարքունիքում սահմանապահների տեղակայման հարցը. Ավինյան

Ադրբեջանական ստորաբաժանումները պետք է լքեն Հայաստանի տարածքը, մենք ջանք չենք խնայի այդ խնդիրը լուծելու համար: Այս մասին Գյումրիում լրագրողների հետ ճեպազրույցում հայտարարեց ՀՀ փոխվարչապետի պաշտոնակատար Տիգրան Ավինյանը:

Նրա խոսքով, Հայաստանը սահմանային ճգնաժամի հարցում իր դիրքորոշումից չի նահանջի։ 

Ավինյանը տեղեկացրեց, որ Հայաստանը ռուսական կողմի հետ քննարկում է Գեղարքունիքի մարզում սահմանապահների տեղակայման հարցը, որը կարող է տեղի ունենալ միայն այն դեպքում, եթե ադրբեջանական զորքերն ամբողջությամբ լքեն Հայաստանի տարածքը:  

«Քննարկումները հակառակորդի զորքերի դուրսբերման շուրջ շարունակվում են, մոտ ժամանակներս սպասվում է այդ բանակցությունների ևս մեկ փուլ»,- ասաց փոխվարչապետի պաշտոնակատարը։

VERELQ-ը հիշեցնում է, որ նախօրեին Զինված ուժերի գլխավոր շտաբի պետ Արտակ Դավթյանը ևս հայտարարել էր, որ Գեղարքունիքի մարզի սահմանային հատվածում ռուս սահմանապահներ են տեղակայվելու: Նրա խոսքով, այս պահին վերջնակա որոշում չկա, գործընթացներն ընթանում են: «Վերջնական որոշումը միայն մեր կողմի ցանկությունը չէ, բանակցություններ են ընթանում, մասնակցում է նաև մյուս կողմը»,- ասաց նա՝ հավելելով, որ ժամկետի, գործընթացի բուն կատարման մասին տեղյակ կպահեն:

Հարցին՝ ադրբեջանական կողմը ևս համամիտ է ռուս խաղաղապահների տեղակայնանը, նա նշել էր. «Մենք մեր տարածքում Ադրբեջանին հարցնելու ոչինչ չունենք, բայց բանակցություններն ընթանում են ռուսական կողմի հետ, որովհետև հարցեր կան, և մեր նպատակն առանց բախումերի մեր տարածքում հայտնված ադրբեջանական ստորաբաժանումների հեռացումն է»: