Գեղարքունիքի մարզում ռուս սահմանապահներ տեղակայելու շուրջ բանակցություններ են ընթանում. ԳՇ

Զինված ուժերի գլխավոր շտաբի պետ Արտակ Դավթյանը հայտարարել է, որ Գեղարքունիքի մարզի սահմանային հատվածում ռուս սահմանապահներ են տեղակայվելու:

Նրա խոսքով, այս պահին վերջնակա որոշում չկա, գործընթացներն ընթանում են: «Վերջնական որոշումը միայն մեր կողմի ցանկությունը չէ, բանակցություններ են ընթանում, մասնակցում է նաև մյուս կողմը»,- ասաց նա՝ հավելելով, որ ժամկետի, գործընթացի բուն կատարման մասին տեղյակ կպահեն:

Հարցին՝ ադրբեջանական կողմը ևս համամիտ է ռուս խաղաղապահների տեղակայնանը, նա նշեց. «Մենք մեր տարածքում Ադրբեջանին հարցնելու ոչինչ չունենք, բայց բանակցություններն ընթանում են ռուսական կողմի հետ, որովհետև հարցեր կան, և մեր նպատակն առանց բախումերի մեր տարածքում հայտնված ադրբեջանական ստորաբաժանումների հեռացումն է»:

Գեղարքունիքի մարզում որոշ հավանական զիջումների մասին հարցին Դավթյանը պատասխանեց, որ որևէ զիջում չի լինելու, և ադրբեջանական ԶՈՒ-ին դուրս բերելու հարցը, եթե չկարգավորվի բանակցություններով, ապա կկարգավորվի համապատասխան գործողություններով:

ԳՇ պետը նշեց, որ ադրբեջանական ստորաբաժանումների ներկայացուցիչների թիվը ՀՀ տարածում չի փոփոխվել, միջադեպեր այս պահին նախկին ծավալով չկան:

VERELQ-ը հիշեցնում է, որ վարչապետի պաշտոնակատար Նիկոլ Փաշինյանը մայիսի 27-ին Անվտանգության խորհրդի նիստում առաջարկեց հայ և ադրբեջանական զինված ուժերի ստորաբաժանումները հայելային կերպով հետ քաշել սահմանի Սոթք-Խոզնավար հատվածից և այնտեղ տեղակայել միջազգային դիտորդների:

«Որից հետո արդեն կրկին միջազգային հովանու ներքո տեղի ունենա սահմանային կետերի ճշգրտման աշխատանք: Տվյալ դեպքում կրկին իմ պատկերացումն այն է, որ Ռուսաստանի կամ ԵԱՀԿ Մինսկի խումբը ներկայացնող դիտորդներ պետք է ներգրավված լինեն, ու այս գործընթացը պետք է տեղի ունենա Ռուսաստանի կամ ԵԱՀԿ Մինսկի խմբի համանախագահության գործունեության ներքո», - ասել էր նա: