Սյունիքի սահմանային հատվածում՝ «Սև լիճ» կոչվող տեղանքում, որը մայիսի 12-ից անցել է ադրբեջանական կողմի վերահսկողության տամ, իրավիճակի փոփոխություն չկա, բանակցությունները շարունակվում են: Այդ մասին հայտնում են Հայաստանի պաշտպանության նախարարությունից՝ չներկայացնելով մանրամասներ:
Նախարարության հայտնած տվյալները հաստատում են նաև «Սև լիճ» տեղանքի ուղղությամբ տեղակայված Վերիշեն համայնքի ղեկավարությունը: Այնտեղից հայտնել են, որ Սև լճի շուրջ բանակցությունները երեկ արդյունք չեն տվել։ Կողմերը պայմանավորվել են հանդիպել այսօր 12:00-ին։
Գորիսի փոխքաղաքապետ Մենուա Հովսեփյանը ԶԼՄ-ներին տեղեկացրել է, որ «Սեւ լիճը» շարունակում է մնալ ադրբեջանական վերահսկողության տակ, բանակցությունները շարունակվում են:
«Դրական արդյունք չի տվել երեկվա բանակցությունները, շարունակում են մնալ այդտեղ, նույն դրությունն է։ Հիմա էլ բանակցություններն ընթանում են։ Մեր կողմից բանակցում են առաջին բանակային կորպուսն ու սահմանապահ զորքերը», - ասել է Հարությունյանը։
Երեկ՝ մայիսի 12-ին, ադրբեջանական կողմի հետ ռուսական և հայկական զինվորականների մասնակցությամբ տեղի ունեցած բանակցությունների անարդյունավետության մասին վկայում է նաև վարչապետի պաշտոնակատար Նիկոլ Փշինյանի գլխավորությամբ երեկ գիշերը տեղի ունեցած Անվտանգության խորհրդի նիստը:
Փաշինյանը հաստատել է՝ Ադրբեջանի զինված ուժերը հատել են Հայաստանի պետական սահմանը և խորացել մինչև 3,5 կիլոմետր՝ Սյունիքի Սև լճի հարակից տարածքում։ «Դա ոտնձգություն է Հայաստանի Հանրապետության ինքնիշխան տարածքի նկատմամբ», - ընդգծել է վարչապետի պաշտոնակատար Նիկոլ Փաշինյանը՝ նշելով, որ առաջնային ծրագիրը բանակցությունների միջոցով, նաև դիվանագիտական եղանակներով այս խնդիրը լուծելն է:
«Բայց սա տարբերակներից մեկն է։ Պետք է արձանագրել, որ իրավիճակն առնվազն մերձճգնաժամային է, եթե չասենք ճգնաժամային», - նշել է նա:
Ավելի վաղ Երեւանը հայտնել էր, որ ադրբեջանական զինուժը, «սահմանների ճշգրտման» հիմնավորմամբ, փորձել է որոշակի աշխատանքներ իրականացնել Սյունիքի սահմանային հատվածներից մեկում: Նշվել էր նաև, որ հայկական ստորաբաժանումների ձեռնարկած միջոցառումներից հետո ադրբեջանական զինվորականները դադարեցրել են այդ աշխատանքները։ Այս պահին ընթանում են բանակցություններ՝ ստեղծված իրավիճակը հարթելու ուղղությամբ։
Սահմանին իրավիճակը նախօրեին քննարկել են Հայաստանի և Ռուսաստանի արտգործնախարարներ Արա Այվազյանը և Սերգեյ Լավրովը։ Ավելի վաղ պարոն Լավրովը Բաքու կատարած այցի ժամանակ քննարկել էր Լեռնային Ղարաբաղի իրավիճակը Ադրբեջանի նախագահ Իլհամ Ալիեւի եւ իր գործընկեր Ջեյհուն Բայրամովի հետ:
Հայտնի է միայն, որ երեկ երեկոյան Հայաստանի պաշտպանության նախարարի պաշտոնակատարը հեռախոսազրույց է ունեցել ռուս գործընկերոջ հետ։ Ըստ ռուսական կողմի՝ Սերգեյ Շոյգուն ու Վաղարշակ Հարությունյանը քննարկել են «իրավիճակը այն տարածքներում, որտեղ առաջադրանքներ է կատարում Ղարաբաղում տեղակայված ռուսական խաղաղապահ զորախումբը, ինչպես նաև կողմերի համար փոխադարձ հետաքրքրություն ներկայացնող այլ թեմաներ»:
Պաշտոնական հաղորդագրության մեջ որևէ խոսք չկա Հայաստանի պետական սահմանի հատման, այս հարցի շուրջ Մոսկվայի դիրքորոշման կամ հնարավոր քայլերի մասին: Հատկանշական է, որ Ռուսաստանի արտգործնախարար Սերգեյ Լավրովն օրեր առաջ էր Երևանում անվտանգության ապահովման երաշխքներ էր տվել։
