Դադարեցնել Բաքվի հետ ցանկացած բանակցություն մինչև գերիների վերադարձը. պարգամավորի կոչը

Հայաստանը պետք է հայտարարի ադրբեջանական կողմի հետ ցանկացած քաղաքական բանակցությունների դադարեցման մասին այնքան ժամանակ, քանի դեռ առանց բացառության բոլոր ռազմագերիները չեն վերադարձվել։ Այս մասին այսօր ՝ ապրիլի 13-ին, խորհրդարանում հայտարարել է անկախ պատգամավոր Արման Բաբաջանյանը։

Նրա խոսքով, Ադրբեջանի նախագահ Իլհամ Ալիևը ռազմագերիների հարցն օգտագործելու է Հայաստանում ընտրական գործընթացների ժամանակ իր համար շահավետ ներքաղաքական բարդ իրավիճակ ապահովելու համար: «Հայաստանը չպետք է վախենա մտքի եւ ռազմավարական հնարավորությունների ռեւանշից, աշխարհաքաղաքական հնարավորությունների ռեւանշից», - հայտարարել է նա: Հայաստանը պետք է վերանայի իր մոտեցումները, «գտնի իրեն» և նոր գործընկերների միջոցով կարողանա ապահովել ներքին հնարավորությունների վերածնունդը։

Հակառուսական հայացքներով հայտնի Բաբաջանյանը վստահ է, որ «հայ գերիները դարձել են ռուս-թուրքական տանդեմի պատանդները»։

«Ռուսաստանը չի կարող միջնորդի իր դերը կատարել, որը նախատեսված է 2020 թվականի նոյեմբերի 9-ին ստորագրված հայտարարություն-համաձայնագրով։ Այդ փաստաթղթով Ռուսաստանը պետք է երաշխավորեր մեր հայրենակիցների վերադարձը։ Հենց Մոսկվան, այլ ոչ թե Պեկինը, Վաշինգտոնը կամ Փարիզը, պետք է կատարի այդ պարտավորությունը, Հայաստանը, որը հայտնվել է ռուս-թուրքական ճիրաններում, ի վիճակի չէ ինքնուրույն լուծել այդ հարցը», - հայտարարել է Բաբաջանյանը։

Նա ընդգծել է, որ Հայաստանն ու Արցախը վստահել են Ռուսաստանին անվտանգության հարցերի լուծումը, որն ի վիճակի չէ դա անել։