Ադրբեջանում հայերի նկատմամբ ատելությունը գագաթնակետին է հասել. պատգամավոր

Հայ ժողովրդի հանդեպ ատելությունը դարձել է Բաքվի վարած քաղաքականության անհերքելի և անբաժանելի մասը, և ռազմավարի այգու բացման արարողությունն դրա բացահայտ ցուցադրությունն է։ Այս մասին այսօր՝ ապրիլի 13-ին, հայտարարել է «Իմ քայլը» խմբակցության պատգամավոր Նազելի Բաղդասարյանը։

Նրա խոսքով, տարիներ շարունակ հայերի նկատմամբ իրականացվող ատելության քաղաքականությունն այսօր հասել է իր գագաթնակետին: «Դա անհարգալից վերաբերմունք է մեր զոհերի, անհետ կորածների և գերիների նկատմամբ։ Հայերի նկատմամբ այլատյացությունը հետեւողականորեն խրախուսվել է երկար տարիների ընթացքում», - հայտարարել է պատգամավորը։

Նա ընդգծել է, որ խորհրդարանի անդամները, քաղաքական դաշտի ներկայացուցիչներն ընդհանուր առմամբ, անկախ իրենց քաղաքական հայացքներից, պետք է միավորվեն եւ աշխարհին ցույց տան, որ հայ ժողովրդի պատիվն ու արժանապատվությունը վեր է ամեն ինչից:

Նշենք, որ նախօրեին Բաքվում բացվել է ռազմավարի զբոսայգի, որտեղ տեղակայված է ադրբեջանական զորքերի կողմից Արցախում վերջին ռազմական գործողությունների ընթացքում բռնագրավված հայկական բանակի տեխնիկան: Բացման արարողությանը մասնակցել է Ադրբեջանի նախագահը։

Այնտեղ տեղադրված են հայ զինվորների նվաստացուցիչ մանեկեններ, իսկ նրանցից ոմանք «հրամանատարների կողմից գամված զենքին, որպեսզի կանխեն նրանց փախուստը ռազմաճակատից», ինչը խիստ բացասական է ընկալվել Հայաստանում։

«Ադրբեջանի հայատյաց քաղաքականությունը նորանոր դրսևորումներ է ստանում», - ասել է Հայաստանի Մարդու իրավունքների պաշտպան Արման Թաթոյանը՝ մեկնաբանելով Բաքվում այսպես կոչված ռազմավարի զբոսայգին: Այս ամենը, ըստ նրա, վառ կերպով ցույց է տալիս Ադրբեջանի իշխանությունների իրական վերաբերմունքը հայ ժողովրդի և քաղաքացիների նկատմամբ էթնիկ հատկանիշով։

«Ատելության քարոզչությունը ոչ միայն չի դադարել, այլև շարունակվում է նոր ուժով», - ընդգծեց պաշտպանը: