Ջեբրաիլի հայկական եկեղեցու քանդումը մշակութային ցեղասպանության ակտ է. դեսպան Տողանյան

Լեռնային Ղարաբաղի Ջեբրաիլ քաղաքում հայկական եկեղեցու քանդումը մշակութային ցեղասպանության ակտ է։ Այս մասին ՌԲԿ-ին հայտնել է Ռուսաստանում Հայաստանի դեսպան Վարդան Տողանյանը։

«Այն, ինչ մենք տեսնում ենք պատերազմի ավարտից հետո, հայերի ոչնչացման շարունակությունն է, այժմ դա հոգևոր ժառանգությանն է վերաբերում։ Դա մշակութային ցեղասպանության գործընթաց է։ Այն ամենը, ինչ կապված է Հայաստանի պատմության, քրիստոնեության պատմության հետ, ոչնչացվում է Ադրբեջանի կողմից։ Այժմ BBC-ի թղթակիցները արձանագրել են միջնադարյան հայկական եկեղեցու ոչնչացումը։ Փառք Աստծո, այն, ինչ մնում է այն տարածքում, որը վերահսկում է Արցախի (Լեռնային Ղարաբաղի) բանակը ռուս խաղաղապահների պատասխանատվության գոտում, պահպանվել է», — հայտարարել է նա։

Դեսպանի կարծիքով՝ Ադրբեջանը կոպտորեն կերպով ոտնահարում է միջազգային իրավունքը, վարում է հայկական ժառանգության ոչնչացման քաղաքականություն և խոսում է «բարիդրացիության» մասին։ Նա հավելել է, որ Ադրբեջանը նաև ոչնչացնում է Հայրենական մեծ պատերազմի հերոսների հուշարձանները։ Օրինակ, Շուշի քաղաքում, ըստ նրա, պայթեցվել է ԽՍՀՄ կրկնակի հերոս, օդաչու Նելսոն Ստեփանյանի հուշարձանը, ինչպես նաև ոչնչացվել է ԽՍՀՄ Սև մետալուրգիայի ժողկոմ Իվան Թևոսյանի հուշարձանը։

Ավելի վաղ BBC-ի լրատվական ծառայությունը տեսանյութ էր հրապարակել, որում փաստագրված է Մեխակավան (Ջեբրաիլ) բնակավայրի մոտ գտնվող Զորավոր Սուրբ Աստվածածին եկեղեցու ամբողջական ոչնչացումը, որը տեղի է ունեցել այն բանից հետո, երբ շրջանը անցել է Ադրբեջանի վերահսկողության տակ: Նույն այդ եկեղեցին արդեն պղծվել էր վերջերս Արցախի դեմ Ադրբեջանի ագրեսիայի ժամանակ։