Ադրբեջանն ու Թուրքիան կփորձեն հասնել դիրքային առավելությունների. Աբրահամյան

Ադրբեջանն ու Թուրքիան կփորձեն հասնել դիրքային առավելությունների: Այս մասին ասուլիսում հայտարարեց «Հենակետ» վերլուծական կենտրոնի ղեկավար, Արցախի նախագահի նախկին խորհրդական Տիգրան Աբրահամյանը:

Ըստ նրա, Ադրբեջանը և Թուրքիան կփորձեն դիրքային առավելությունների հասնել, մասնավորապես,  Վայոց Ձորում և Գեղարքունիքում, այսինքն այնպես, ինչին ականատեսն ենք Սյունիքում:

Նրա կարծիքով, մենք խնդիր ունենք (նոր իրողությունների պայմաններում) արագ գրավել նոր բարձունքներ  նոր սահմանների պարագայում, ստեղծել նոր ենթակառուցվածքներ ու տեխնիկապես վերազինել առաջնագիծը:

«Դա թույլ կտա ոչ միայն կանխել Ադրբեջանի առավել բարենպաստ դիրքավորումը, այլև քաղաքական առումով մեզ հնարավորություն կտա հետագա գործընթացներում նվազեցնել մեզ վրա ճնշման հավանականությունը», - վստահ է Աբրահամյանը:

Ինչ վերաբերում է ղարաբաղյան հակամարտությանը, բանախոսը նշեց, որ այն կարգավորված չէ, քանի որ Արցախի կարգավիճակը դեռ որոշված ​​չէ, և այդ հարցը նույնիսկ ներառված չէ քննարկումների գերակա օրակարգում:

«Այսօր Բաքուն ճնշման նոր գործիքներ ունի Հայաստանի և Արցախի վրա, և սա, առաջին հերթին, Սյունիքն է, քանի որ այս տարածաշրջանով անցնող ռազմավարական նշանակություն ունեցող որոշ ճանապարհներ գտնվում են Ադրբեջանի անմիջական վերահսկողության տակ: Ճնշման այս գործիքներով նրանք կփորձեն հասնել իրենց կողմից առաջադրված առավելագույն խնդիրների լուծմանը», - հավելեց փորձագետը: