2020 թվականի Երևանի բյուջեի կատարողականն ուղղակի սենսացիոն է՝ ոչ միայն մայրաքաղաքի, այլև Հայաստանի երեք խոշոր քաղաքների պատմության և կենսագրության մեջ այսպիսի դեպք երբեք չի արձանագրվել, որ բյուջեի կատարողականը ներկայացվի 60 տոկոսով: Այս մասին VERELQ-ի հետ զրույցում ասաց Երևանի ավագանու "Բարգավաճ Հայաստան" խմբակցության քարտուղար Հռիփսիմե Առաքելյանը:
Նրա խոսքով՝ սա ուղղակի Հայկ Մարությանի, քաղաքային և կենտրոնական իշխանության անգործության հերթական ապացույցն է.
"Սա նաև կենտրոնական իշխանության բացահայտ վերաբերմունքն է աշխատանքին, երկրին, պետությանը, այս դեպքում՝ երկրի մայրաքաղաքին: Գործ ունենք սոսկալի խայտառակության հետ և այսօր ես այս ամենի մասին նաև մանրամասն ելույթի տեսքով կխոսեմ",- ասաց ավագանու անդամը:
Նա այն կարծիքին է, որ բյուջեի 60 տոկոսի կատարողականի դեպքում ավագանին դրան ուղղակի պետք է դեմ քվեարկի, իսկ այդ դեպքում քաղաքապետը պետք է հրաժարական տա: Սակայն, նշեց նա, շատ լավ գիտենք, որ այս իշխանությունը "իր ցինիզմով, իր անգործությամբ ու դավաճանական գործողություններով վերին աստիճանի անպատասխանատվություն է ցուցաբերում բոլոր գործընթացներին".
"Եվ այսօր կտեսնենք դրա հերթական դրսևորումը",-շեշտեց նա:
Իսկ թե ինչպիսի բացթողումներ են տեղի ունեցել Երևանի 2020 թվականի բյուջեում, որ ծրագրերը չեն իրականացել՝ ընդդիմադիր խմբակցության անդամը խոստացավ ներկայացնել ավագանու այսօրվա նիստում: Բայց և վստահություն հայտնեց, որ քաղաքային իշխանության պատասխանը այդ ամենին մեկն է լինելու՝ երկրում կորոնվիրուս էր, ապա պատերազմ էր.
"Սակայն այս երկու հանգամանքներն էլ քաղաքային իշխանության աշխատանքների հետ որևէ աղերս չունեն: Իհարկե, կարող են մասնակի ազդեցություն ունենալ, բայց ոչ այսպիսի ահռելի տոկոսային տարբերությամբ: Իսկ այն, ինչ ունենք այսօր, ոչ այլ ինչ է, քան խայտառակություն և իրենց պարզաբանումներին ես ունեմ հստակ պատասխաններ, որոնք էլ այսօր կներկայացնեմ իրենց",- հավելեց Հռիփսիմե Առաքելյանը:
Նշենք, որ Երևանի ավագանու նիստը կմեկնարկի ժամը 11,00-ին:
VERELQ-ը հիշեցնում է, որ նախօրեին Երևանի բյուջեի կատարողականի աղմկահարույց ցուցանիշի մասին բարձրաձայնել էր նաև ավագանու "Լույս" խմբակցության ղեկավար Դավիթ Խաժակյանը: Նա նշել էր, որ 2020թ․ նախատեսված ծախսերի կատարողականը կազմել է 63.5% և հիշեցրել, որ ըստ Բյուջետային համակարգի մասին ՀՀ օրենքի՝ համայնքի բյուջեի կատարման տարեկան հաշվետվությունը չհաստատվելու դեպքում համայնքի ղեկավարը դնում է հրաժարական տալու միջոցով իր լիազորությունները վաղաժամկետ դադարեցնելու հարցը:
