Ադրբեջանցիների կրակոցներից հետո Ագարակում ավելացվել է ռուս սահմանապահների ևս մեկ հենակետ

Ադրբեջանական կողմից հնչած կրակոցներից հետո Ագարակում ավելացվել է ռուս սահմանապահների եւս մեկ հենակետ։ Այս մասին հայտնում է Սյունիքի մարզպետարանը Facebook-ի իր էջում:

«Փետրվարի 13-ին Սյունիքի մարզի Ագարակ գյուղի (Կապան համայնք) հարեւանությամբ ադրբեջանական կողմից հնչել են անկանոն կրակոցներ դեպի օդ։ Փաստն արձնագրվել է հայ եւ ռուս սահմանապահների կողմից․ վերջիններիս հրամանատարությունը մի քանի ժամ շարունակ դիտարկում է կատարել տարածքում, գրանցել միջադեպը, որից հետո տվյալ հատվածում ավելացվել է ռուս սահմանապահների եւս մեկ հենակետ, որտեղ այժմ շուրջօրյա հերթապահություն է իրականացվում»,- տեղեկանում ենք մարզպետարանի էջից։

VERELQ-ը հիշեցնում է, որ ավելի վաղ Ագարակի գյուղապետ Հայկ Սարգսյանն ահազանգել էր, որ ադրբեջանցիները երկու կողմից մոտեցել են համայնքին՝ մի կողմից դիրքերը մոտեցրել են 4 կմ, մյուս կողմից` 1կմ: Նրա խոսքով, ադրբեջանցիները պարբերաբար կրակոցներ են արձակում: