Սա աղետ է. հայ երաժիշտները անելանելի վիճակում են

Հայաստանում մշակույթի ներկայացուցիչները, կորոնավիրուսի համաշխարհային ճգնաժամի անորոշ հանգամանքներով պայմանավորված, արդեն ամիսներ շարունակ աշխատանքի և գումար վաստակելու խնդիր ունեն։


VERELQ-ի հետ զրույցում երաժիշտ Հակոբ Օրդակյանը նշեց, որ ոլորտի ներկայացուցիչները անելանելի վիճակում են հայտնվել.


«Մենք վաստակում ենք մեր երաժշտությամբ, եկամտի մեծ մասը գոյանում է կենդանի ելույթներից, հյուրախաղերից, տարբեր մշակութային նախագծերից։ Մարտ ամսից, համավարակով պայմանավորված, արդեն իսկ կաթվածահար է եղել մշակույթի ոլորտի աշխատանքային գործունեությունը, իսկ հիմա՝ ծանր պատերազմից հետո, արդեն նախ հոգեպես չկա համերգների կամ փառատոնների տրամադրություն, բացի այդ՝ սահմանափակումները շարունակվում են»,- ասաց նա։ 


Օրդակյանը երկար տարիներ աշխատել է տարբեր նախագծերում, 2010թ-ից համագործակցում է Հայաստանի պետական ջազային նվագախմբի հետ, 2011թ-ից նվագում է նաև «Շարակ» խմբում, զուգահեռ աշխատել է նաև «Գոհարափայլ» էթնիկ ջազ անսամբլում, «Գոհար» սիմֆոնիկ նվագախմբում։ Նաև հանդես է եկել անհատ կատարողների հետ։


Հակոբ Օրդակյանը նաև հանդես է եկել Երևանի տարբեր համերգային ակումբներում, ինչպես նաև՝ արտասահմանյան հայտնի բեմերում՝ Լոս Անջելեսի Դոլբի թատրոնում, Staples Center-ում, ինչպես հայ էստրադային հայտնի կատարողների հետ, այնպես էլ՝ օտարազգի, այդ թվում «Գրեմմի»-ի մրցանակակիր Արթուրո Սանդովալի, Արչի Պենայի, Ռաուլ Դե Սոլի, Ռիչի Գարսիայի, Դանթայի և այլոց հետ։


Բացի այս, շարունակեց Օրդակյանը, հայ երաժիշտները զրկվել են նաև դրսի աստղերի հետ աշխատելու հնարավորությունից, տարբեր փառատոնների հետ համագործակցելու տարբերակներից, չեն կարող մասնակցել համերգային շրջագայությունների. "Մենք ուղղակի զրոյական վիճակում ենք հայտնվել և չգիտենք, թե ինչ է լինելու: Սա աղետ է",- հավելեց նա։

Տպել

Загрузка...