Արցախի միջազգային ճանաչումը պետք է ներառի անվտանգության ապահովման երաշխիքներ. ԼՀԿ

Հրադադարը չի հաստատվել, հենց հիմա արցախյան հակամարտության գոտում պատերազմ է ընթանում, թեժ մարտեր են ընթանում Հադրութում։ Այս մասին այսօր՝ հոկտեմբերի 12-ին, լրագրողների հետ զրույցում ասաց «Լուսավոր Հայաստան» խմբակցության ղեկավար Էդմոն Մարուքյանը։

«Այս պահին իրավիճակը շատ ծանր է, ըստ էության մարտի դաշտում որոշվում է հայկական պետության ճակատագիրը, մեր ընդհանուր ճակատագիրը», - հայտարարեց Մարուքյանը: Նրա խոսքով՝ հայկական դիվանագիտությունը պետք է առավելագույն ջանքեր գործադրի հրադադարի ապահովման համար։ Մարուքյանը նշել է, որ խորհրդարանական դիվանագիտությունն ակտիվորեն աշխատում է այդ ուղղությամբ՝ օգտագործելով առկա լծակներն ու խողովակները։

Պատգամավորը նշեց, որ այսօր ժամը 16:30-ին տեղի կունենա ԵԽԽՎ ընդլայնված նիստը, որի ընթացքում կքննարկվի Արցախի դեմ ագրեսիայի հարցը: «Մենք բոլորս գրանցվել ենք, հույս ունենք, որ հնարավորություն կընձեռվի մեր պատվիրակության 2-3 հայտարարության համար», - ասաց նա:

Մարուքյանը նշել է, որ բարեկամական խմբերի անդամներն ամենօրյա ռեժիմով գործընկեր երկրների խորհրդարաններին տեղեկացնում են հակամարտության գոտում իրավիճակի մասին: «Բառացիորեն րոպեներ առաջ ես ստորագրել եմ հայտարարություն, որում նշվում է, որ ստեղծված պայմաններում արցախցիների կյանքի իրավունքի ապահովման միակ հնարավորությունը Արցախի միջազգային ճանաչումն է», - հայտարարել է նա:

Խոսելով Հայաստանի կողմից Արցախի անկախության ճանաչման մասին՝ Մարուքյանը նշել է, որ եթե Հայաստանը ճանաչի Արցախը և մնա միակ երկիրը, որը դա արել է, ապա այդ քայլը ոչ մի բանի չի հանգեցնի։ Դրա հետ կապված անհրաժեշտ է, որ Հայաստանին զուգահեռ Արցախի անկախությունը ճանաչեն նաև այլ երկրներ, օրինակ՝ ԵԱՀԿ Մինսկի խմբի համանախագահ երկրներից մեկը։

Լրագրողների այն հարցին, թե որ երկրները մեծ հավանականությամբ կարող են ճանաչել Արցախի անկախությունը, նա նշել է, որ անհրաժեշտ է աշխատել բոլորի հետ, սակայն այն դեպքում, Ռուսաստանի եւ Ֆրանսիայի հավանականությունը ավելի բարձր է, քան ԱՄՆ-ի:

Ընդ որում, Մարուքյանն ընդգծել է, որ ճանաչումը չպետք է մնա միայն թղթի վրա, այլ պետք է ներառի Արցախի անվտանգության ապահովման երաշխիքներ: