ԼՂ հակամարտության կարգավորման հարցում Իրանի դիրքորոշումը չի փոխվել․ Իրանի դեսպան

Հայաստանում Իրանի դեսպան Աբբաս Բադախշան Զոհուրին մեկնաբանել է Լեռնային Ղարաբաղի հակամարտության կարգավորման հարցում Ադրբեջանում Իրանի դեսպանի հակասական հայտարարությունները։

Այդ մասին Հանրային հեռուստաընկերությանը տված հարցազրույցում ասել է Զոհուրին՝ նկատելով, որ Լեռնային Ղարաբաղի հակամարտության կարգավորման հարցում Իրանի հավասարակշռված դիրքորոշումը չի փոխվել, գրում է «Արմենպրես»-ը:

Հաղորդավարի հարցին՝ Ադրբեջանում Իրանի դեսպանը երբեմն այնպիսի հայտարարություններ է անում, որոնք տարբերվում են Իրանի պաշտոնական դիրքորոշումից, ո՞րն է Իրանի պաշտոնական դիրքորոշումը, դեսպան Զոհուրին մասնավորապես պատասխանել է:

«Լեռնային Ղարաբաղի հակամարտության հարցում Իրանի Իսլամական Հանրապետության դիրքորոշումը միշտ հայտնել ենք, մեր դիրքորոշման մեջ չի եղել որևիցե փոփոխություն։ Եթե կան մարդիկ, որ այլ կարծիքներ են հայտնում՝ դրանք պաշտոնական տեսակետներ չեն, և հավասարակշռված դիրքորոշումը, որը որդեգրել է Իրանը, անփոփոխ է մնացել: Եվ ցանկացած փոփոխություն Իրանի ԱԳՆ մամուլի քարտուղարի միջոցով կներկայացվեր, որը չի արվել», - ասել է նա:

VERELQ-ը հայտնել էր, որ Ադրբեջանում Իրանի դեսպան Ջավիդ Ջահանգիրզադեն հանդիպել էր Ադրբեջանի Լեռնային Ղարաբաղի մարզի ադրբեջանական համայնքի ղեկավար Թուրալ Գյանջալիևի հետ: 

Դրանից առաջ մի խումբ ուսանողներ նախօրեին Թեհրանում ՀՀ դեսպանատան դիմաց այրել են Իսրայելի դրոշը և կոչ արել Հայաստանի իշխանություններին վերանայել Իսրայելում դեսպանատուն բացելու որոշումը։ Բողոքի ակցիայի մասնակիցները կրել են պաստառներ որոնց վրա գրված է եղել «Իսրայելի հետ համագործակցության գինը շատ ծանր է լինելու»: