Օրվա հրաժարականները. Արտակ Դավթյանն ու Էդուարդ Մարտիրոսյանը հեռանո՞ւմ են

«Փաստինֆո»-ի տեղեկություններով՝ ՀՀ զինված ուժերի գլխավոր շտաբի պետ Արտակ Դավթյանն ազատման դիմում է ներկայացրել։

VERELQ-ը հիշեցնում է, որ երեկ տեղի էր ունեցել Դավթյանի որդու բազմամարդ հարսանիքը՝ չնայած պարետի որոշմամբ սահմանված արգելքին։ Հարսանյաց արարողությունը տեղի է ունեցել Բագրեւանդի առանձնատանը, որին մասնակցել են մի շարք պաշտոնյաներ։

Դավթյանն այսօր չի հերքել հարսանյաց հանդեսի փաստը՝ նշելով, թե բոլորն ունեն անձնական կյանքի իրավունք: «Հորդորում եմ որոշ մարդկանց, լրատվամիջոցների չմտնել իմ և իմ ընտանիքի անձնական տարածք և փորձ չանել ինձ ներառել քաղաքական խաղերի մեջ»,- իր պարզաբանման մեջ նշել էր Դավթյանը:

Ի դեպ, ArmDaily.am-ի տեղեկություններով էլ՝ ԱԱԾ տնօրեն Էդուարդ Մարտիրոսյանն է հեռանում պաշտոնից։ Ըստ աղբյուրի՝ նա աշխատանքից ազատման դիմում է ներկայացրել, այսօր՝ ժամը 14.00-ին, ժողով է հրավիրել, որի ժամանակ կհայտարարի այդ մասին, ինչպես նաեւ հրաժեշտ կտա գործընկերներին։