Արցախում մայիսի 9-ի տոնական միջոցառումները կչեղարկվեն

111

Արցախում տեղի չեն ունենա ավանդական երթը դեպի Ստեփանակերտի հուշահամալիր, մարզա-մշակությաին միջոցառումներ ու այլ տոնակատարություններ։ Այս մասին ասված է ԱՀ պարետ, պետական նախարար Գրիգորի Մարտիրոսյանի հայտարարության մեջ։


Հայտարարության մեջ, մասնավորապես, ասվում է.


«Նոր կորոնավիրուսի համավարակը մեծ մարտահրավեր է առաջադրել պետություններին, եւ դրա հաղթահարումը, հանրային առողջության ապահովումն ու պարզապես մարդկային կյանքեր փրկելը դարձել է ամենօրյա պայքարի դրսեւորում:


Առջևում մայիսի 9-նն է՝ Արցախի պաշտպանության բանակի կազմավորման, Շուշիի ազատագրման եւ Հայրենական մեծ պատերազմում հաղթանակի եռատոնը: Նոր կորոնավիրուսի համավարակի սպառնալիքի պայմաններում, սակայն, ստիպված ենք չեղարկել տոնական միջոցառումներն ու սահմանափակվել առավել զուսպ ու ոչ մարդաշատ արարողություններով:


Մասնավորապես, տեղի չեն ունենա ավանդական երթը դեպի Ստեփանակերտի հուշահամալիր, մարզա-մշակությաին միջոցառումներ ու այլ տոնակատարություններ:


Այս օրերին, երբ կրկին վերարժեվորում ենք մեր հաղթանակներն ու հիշում հայրենիքի նվիրյալներին, անչափ կարեւոր է ցուցաբերել քաղաքացիական բարձր պատասխանատավություն ու հիշատակի միջոցառումներին մասնակցել փոքր խմբերով՝ պահպանելով սոցիալական հեռավորությունն ու առողջապահության նախարարության այլ ցուցումները։


Զինվենք համբերությամբ եւ վստահությամբ. հաղթանակներ տոնելու բազմաթիվ առիթներ ունենալու ենք»։


 


 


 

Տպել

Թեմայի այլ նորություններ
Загрузка...