Հայերի համար անհասկանալի է՝ ինչու Իսրայելը չի ճանաչում Հայոց ցեղասպանությունը. նախագահ

Իսրայելը չի կարող հաղթել հակասեմիտիզմի դեմ պայքարում, քանի դեռ չի ճանաչել Հայոց ցեղասպանությունը, «Երուսաղեմ փոստ» պարբերականին տված հարցազրույցում հայտարարել է ՀՀ նախագահ Արմեն Սարգսյանը:

Նախագահը Իսրայելում մասնակցում էր Աուշվից-Բիրկենաուի ազատագրման 75-ամյակը նշանավորող՝ Հոլոքոստի հիշատակի 5-րդ միջազգային ֆորումին:

Սարգսյանն ասել է, որ հայերի մեծ մասի համար անհասկանալի է՝ ո՞րն է Օսմանյան կայսրությունում 1,5 մլն հայերի զանգվածային սպանություններն Իսրայելի կողմից պաշտոնապես չճանաչելու տրամաբանությունը:

«Շատ հայեր հարց են բարձրացնում, թե ինչո՞ւ Իսրայելը, որի ժողովուրդը ևս նման մեծ ողբերգություն է տեսել, չի ճանաչում Հայոց ցեղասպանությունը: Այս հարցին տրամաբանական պատասխան չկա: Ես չեմ կարող ասել, որ պատճառն Իսրայելի և Թուրքիայի հարաբերություններ են»,- ասել է նախագահ Սարգսյանը՝ ընդունելով, որ 1949-ի մարտին ձևավորված իսրայելա-թուրքական հարաբերությունները, հավանաբար, կատալիզատոր են Իսրայելի լռության համար:

Նախագահը նշել է, որ Իսրայելի և Թուրքիայի հարաբերությունները կարող են մեկ օր լավ լինել, մեկ այլ օր՝ վատ, սակայն ճշմարտությունը մնալու է, իսկ մարդկային ողբերգությունը ճանաչելը բացառապես բարոյականության հարց է:

«Ճանաչումը չպետք է կապված լինի Իսրայելի պետության այս կամ այն շահի կամ մեկ այլ բանի հետ, որը կարևոր է միայն այդ պահին»,– ասել է նախագահը՝ հույս հայտնելով, որ Իսրայելի չկամությունը` կանգնելու Հայաստանի կողքին երկու համեմատելի ողբերգության՝ Հոլոքոստի և Հայոց ցեղասպանության հարցում, վնասում է Իսրայելի և հրեա ժողովրդի ջանքերին «համաճարակի պես տարածվող հակասեմիտիզմի դեմ պայքարում»:

Ըստ նրա՝ Ցեղասպանության ճանաչումը կարող է հակառակ ազդեցությունն ունենալ:

Նախագահը նշել է, որ մասնակցում է Հոլոքոստի հիշատակի համաշխարհային ֆորումին, քանի որ չի կարծում, որ յուրաքանչյուր հայի համար ճիշտ կլիներ Հոլոքոստի ողբերգության հիշատակը կապել այն հանգամանքի հետ՝ Իսրայելի խորհրդարանը ճանաչում է Հայոց ցեղասպանությունը, թե՝ ոչ:

Հայոց ցեղասպանությունը ճանաչել է ավելի քան 30 երկիր: 2019-ին վերջին ԱՄՆ Ներկայացուցիչների պալատը և Սենատը ևս ընդունել էին Հայոց ցեղասպանությունը ճանաչող բանաձևեր: