Մնացականյանը Ժնևում հունվարի 29-ին կհանդիպի Մամեդյարովին

85

Հայաստանի ԱԳՆ նախարար Զոհրաբ Մնացականյանը Ժնևում հունվարի 29-ին կհանդիպի Ադրբեջանի ԱԳ նախարար Էլմար Մամեդյարովին: Այս մասին հայտնում են ԱԳՆ-ի մամուլի ծառայությունից:


«Հունվարի 29-ին և 30-ին ՀՀ ԱԳ նախարար Զոհրաբ Մնացականյանը Ժնևում հանդիպումներ կունենա ԵԱՀԿ Մինսկի խմբի համանախագահների և վերջիններիս միջնորդությամբ և մասնակցությամբ՝ Ադրբեջանի ԱԳ նախարարի հետ։ Անդրադարձ է կատարվելու ԼՂ խաղաղ կարգավորմանն առնչվող հարցերի լայն շրջանակի», - ասված է հաղորդագրության մեջ։



Հատկանշական է, որ տեղեկությունը միաժամանակ հրապարակել է նաև ադրբեջանական կողմը։


Հետաքրքրական է նաև այն, որ երկու պետությունների արտգործնախարարները հանդիպում են Մյունխենում փետրվարի 14-16-ը սպասվող Անվտանգության համաժողովից մի քանի շաբաթ առաջ, որին մասնակցելու են Հայաստանի ու Ադրբեջանի ղեկավարները՝ Նիկոլ Փաշինյանն ու Իլհամ Ալիևը:


Ի դեպ Փաշինյանն օրեր առաջ Կապանում կայացած իր ասուլիսի ժամանակ չի բացառել, որ Մյունխենի Անվտանգության համաժողովի շրջանակում Ադրբեջանի նախագահ Իլհամ Ալիևի հետ հանդիպման հնարավորությունը:


«Այս պահին հանդիպման պայմանավորվածություն չկա: Հանդիպումը բացառել չի կարելի, քանի որ քննարկումների փուլում են: Եվ ընդհանրապես, եթե չեմ սխալվում, չեմ ասել, որ դեկտեմբերի 20-ին Սանկտ Պետերբուրգում, երբ ԱՊՀ հավաք էր, այդտեղ շփվել ենք: Ես այդ կարգի շփումներն օգտակար եմ համարում»,-ասաց վարչապետը: Այսինքն՝ եթե լինի առիթ՝ խոսելու, քննարկելու, Փաշինյանը կարծում է, որ դա վնասակար չէ, օգտակար է։


Վերջին անգամ Հայաստանի և Ադրբեջանի ԱԳ նախարարները հանդիպել են Բրատիսլավայում անցյալ տարվա դեկտեմբերին, որի ժամանակ նրանք պայմանավորվել էին ղարաբաղյան կարգավորման հարցով հերթական հանդիպումն անցկացնել 2020 թվականի սկզբին:


Բրատիսլավայում նախարարները 3 ժամ տևած հանդիպման ընթացքում «լայն քննարկումներ» են ունեցել: «Կողմերը քննարկել են բանակցային գործընթացի ներկայիս վիճակը և ղարաբաղյան հակամարտության խաղաղ կարգավորման ճանապարհները»,- նշվում է հայտարարությունում:

Տպել

Թեմայի այլ նորություններ
Загрузка...