Վրաստանը պետք է քննարկի ՆԱՏՕ-ին առանց Աբխազիայի և Հարավային Օսիայի անդամակցելու հարցը

Վրաստանի իշխանությունները պետք է քննարկեն ՆԱՏՕ-ին «առանց Աբխազիայի եւ Հարավային Օսիայի» անդամակցելու հարցը: Այս կարծիքն է արտահայտել ՆԱՏՕ-ի նախկին գլխավոր քարտուղար Անդերս ֆոգ Ռասմուսենը, գրում է ՌԻԱ Նովոստին:

Տարածքային հակամարտությունների լուծումը ՆԱՏՕ-ին անդամակցելու չափանիշներից մեկն է, սակայն 2008 թվականի օգոստոսի զինված հակամարտությունից հետո Աբխազիան եւ Հարավային Օսիան անկախություն են ստացել, որը ճանաչել են ՌԴ-ն եւ մի շարք այլ երկրներ: Եվ եթե Վրաստանը պետք է դառնա ՆԱՏՕ-ի ապագա անդամ, ապա, նշել է Ռասմուսենը, նա պետք է շարունակի ժողովրդավարության բարեփոխումները, պայքարի կոռուպցիայի դեմ, ապահովի խոսքի ազատությունը եւ փոքրամասնությունների պաշտպանությունը, ինչպես նաև բանավեճ սկսի այն հարցի շուրջ, թե արդյոք Թբիլիսիի համար ընդունելի է ՆԱՏՕ-ի անդամ դառնալ առանց Աբխազիայի եւ Հարավային Օսիայի:

«Այդ որոշումը պետք է ընդունի Վրաստանը, ինչից հետո որոշման մասին հարկավոր է ծանուցել Ալյանսին»,- հայտարարել Է Ռասմուսենը Թբիլիսիում ընթացող միջազգային խորհրդաժողովի ժամանակ: