Քոչարյանի գործը խնդիր չէ. Ռուսաստանի հետ ՀՀ-ն որեւէ տարաձայնություն չունի. Մնացականյան

Հայաստանի եւ Ռուսաստանի միջեւ միջպետական հարաբերությունները բավական ամուր հիմքեր ունեն եւ մենք որեւէ տարաձայնություն չունենք: Այս մասին այսօր հրավիրված մամուլի ասուլիսի ժամանակ հայտարարեց ՀՀ արտաքին գործերի նախարար Զոհրաբ Մնացականյանը։

Այսպես պատասխանեց ՀՀ ԱԳ նախարարը լրագրողի հարցին, թե որքանով են հավաստի մամուլում շրջանառվող տեղեկություններն առ այն, որ ՌԴ նախագահ Վլադիմիր Պուտինը Հայաստանի իշխանությունների առջեւ խնդիր է դրել մինչեւ հոկտեմբերի սկզբին Երեւան կայանալիք իր այցը ազատության մեջ տեսնել ՀՀ երկրորդ նախագահ, Մարտի 1-ի գործով մեղադրյալ Ռոբերտ Քոչարյանին:

«Ունենք որոշ դատական, իրավական բնույթի գործընթացներ, սակայն միջպետական մակարդակով Հայաստանն ու Ռուսաստանը կարող են եւ ունակ են պահպանել այն կարեւոր օրակարգը, որի հիմքում է երկրների դաշնակցային հարաբերությունների խորացնելու նպատակը։ Հարցերի փոխկապակցվածություն որեւէ կերպ գոյություն չունի եւ չի կարող ունենալ», - ասաց Մնացականյանը:

Հիշեցնենք, որ ՀՀ սահմանադրական դատարանը սեպտեմբերի 4–ին մասնակի բավարարել էր ՀՀ երկրորդ նախագահ Ռոբերտ Քոչարյանի դիմումը։ Բարձր դատարանը ՀՀ քրեական դատավարության օրենսգրքի 35-րդ հոդվածի 2–րդ մասը ճանաչել է Սահմանադրությանը հակասող եւ անվավեր։ Այսպիսով արձանագրվել է, որ 35-րդ հոդվածի 2–րդ մասում նշված քրեական հետապնդումը բացառող հանգամանքների թվում անձեռնմխելիությանը վերաբերող կարգավորում առկա չէ, ինչը հակասահմանադրական է։

Փոխարենը ՍԴ–ն սահմանադրական է ճանաչել 135-րդ հոդվածի 2-րդ մասը՝ խափանման միջոց կիրառելու հիմքերի սահմանադրականության հարցին վերաբերող հոդվածը։